Дагъустандин Кьилин везифаяр вахтуналди тамамарзавай Сергей Меликов “Хевел” компанийрин дестедин регьбер Игорь Шахраяхъ галаз гуьруьшмиш хьайила республикада ракъинин 15 МВт-дин къуватлувал авай электростанция эцигунин месэла веревирдна. И проект Южно-Сухокумск шегьердин мулкарал кьилиз акъудун фикирдиз къачунва.
Сергей Меликован гафаралди, “Хевелдин” руководстводихъ галаз кьиле фейи сад лагьай гуьруьш санал тамамардай кIвалахрин эвел я. КIвалахар лагьайтIа, республика патал кар алай месэла гьялунихъ — Дагъларин уьлкведин вири хуьрериз экв тухунихъ галаз алакъалу я.
“Заз Дагъустандин мулкарал ракъинин энергия гьасилунин жигьетдай кьетIен кластерар кардик кутун патал лазим тир серенжемар кьабулзавай “Хевел” компанийрин дестедин кьилевайбуруз сагърай лугьуз кIанзава. Къе чна и месэла Южно-Сухокумскда ва республикадин кеферпатан районра гьялунин рекьер веревирдна. Инлай кьулухъ амай районрани ракъинин энергия вилик тухун планрик кутунва. Промышленность, хуьруьн майишат, эцигунар, яшайишдин маса хилер вилик физвай чIавуз и месэладин важиблувал мадни артух жезва. Санкт-Петербургдин экономикадин форумдин сергьятра аваз чна икьрардал къулар чIугвада ва алай йисан гатуз кIвалахрив эгечIда”, — лагьана республикадин Кьили.
Игорь Шахрая хабар гайивал, Южно-Сухокумскда электростанция эцигунин крарив июндин вацра эгечIда. 2022-йисан кьвед лагьай кварталда проект тамамарна акьалтIардайвал я. Къейд ийин хьи, проект кьилиз акъудун патал желб ийизвай инвестицийрин кьадар 1 млрд манатдилай алатда.
“Налогрилайни инвестицийрилай гъейри, и проектди кIвалахдай алава чкаярни арадал гъида. Идалай гъейри, чаз Дагъустанда мад са шумуд объект эцигдай ниятар ава. Ихтилат агьалияр энергиядалди таъминарунин игьтияж авай 11 райондикай физва. Гьелелиг и месэла веревирдна акьалтIарнавач. Чна проектар гьазурда, чи теклифар агакьарда. Абур республика патал хийир авайбур жедайдак чна умудар кутазва”, — лагьана Игорь Шахрая.
«Лезги газет»
