Кьилин редактордин гаф
Апрелдин эхирра республикадин сиясатдин, жемиятдин уьмуьрда лишанлу вакъиа кьиле фена: Дагъустандин Кьилин везифаяр вахтуналди тамамарзавай Сергей Меликова сифте яз ачух эфир кьиле тухвана.
Экспертри къейдзавайвал, гьукумдин векилри агьалийрихъ галаз алакъа хуьнин карда ихьтин къайдаяр ишлемишуни кIвалахдин менфятлувал хкажзава. Гьелбетда, чкайрал физ, жемятдихъ галаз гуьруьшар тешкилун и жигьетдай мадни хъсан я, амма и кар яргъалди давам жедай месэла я. Фикир це садра, гьар са райондиз, хуьруьз фин патал гьикьван вахт герек жедатIа. Ачух эфирди лагьайтIа, республикадин интернет, мобильный алакъа авай гьар са пипIяй региондин кьилевайдаз суалар гудай мумкинвал яратмишзава.
Гаф кватай чкадал лагьана кIанда, Сергей Меликов районра авай гьаларихъ галаз чкайрал физни таниш жезва. Мисал яз, мукьвара ам Кьиблепатан Да-гъустандиз мугьман хьанай. Ачух эфирдин эвел кьиляй ада и кардикай куьрелди суьгьбетна ва майдин вацра вич республикадин кеферпатан районриз физвайдакай хабар гана. И делилди руководстводи халкьдихъ галаз алакъаяр мягькемарун кьилин месэлайрикай сад яз гьисабзавайди къалурзава.
Ачух эфирдин кьетIенвилерикай сад ам тир хьи, мярекат ахъа къайдада кьиле фена, яни республикадин Кьилиз гудай суалар виликамаз тайинарнавачир. Гьар са дагъустанвидивай, арада арачи авачиз, Сергей Меликоваз вичин дердидикай хабар гуз жезвай. Ахьтинбурун кьадарни тIимил тушир. Мисал яз, Сулейман-Стальский райондай тир Эрзиман Жарулаева вичив сагъламвал мягькемарун патал гьукуматди гузвай “Бараклюд” дарман вахтунда агакь тийизвайди лагьана. Сергей Меликова ихьтин месэлайриз талукь идарайри энгел тавуна фикир гана кIанзавайди къейдна. “Медицинадин рекьяй куьмек гузвай квотаяр вахтунда чара тавуниз талукь яз къвезвай арзайрин патахъай кIеви серенжемар кьабулда”, — лагьана, региондин Кьили здравоохраненидин министерстводал Э.Жарулаеван месэла 30-апрелдалди гьялун ва вуж себеб яз агьалидив вахтунда дарман агакьначтIа тайинарун тапшурмишна.
Ачух эфир кьиле физвай чIавуз атай са жерге арзайрин, суалрин патахъай Сергей Меликова гъиле-гъилди са шумуд идарадиз, кьилдин чиновникриз тапшуругъар гана. И мисалрай аквазвайвал, Дагъустандин Кьили вич гайи гаф хуьзвай кас тирди краралди субутзава.
Лагьана кIанда, ачух эфирди, гьи районда гьихьтин месэлаяр, кимивилер, нукьсанар аватIа, винел акъудна. Саки пуд сятда давам хьайи мярекатдин сергьятра аваз Сергей Меликоваз жуьреба-жуьре хилериз талукь цIудралди суалар гана: мектебар авай гьаларикай, аялрин бахчаяр бес кьадар тахьуникай, гзаф аялар авай хизанрин дердийрикай, етимриз куьмек гуникай, алакьунар авай жегьилрик руьгь кутуникай, зирзибилдикай, хуьрер экуьналди, газдалди таъминаруникай ва маса месэлайрикай. Суалриз жавабар гудайла, республикадин Кьили къейд авурвал, хейлин хуьрера цIийи мектебар, аялрин бахчаяр эцигда, яшайишдин жигьетдай гуьгъуьна амай районриз сифте нубатда куьмек гуда. Гьелбетда, вири месэлаяр садлагьана гьялиз жедач. Амма, Сергей Меликован гафарай малум хьайивал, абуруз фикир тагана тадач.
Бязи месэлаяр гьялунив гъиле-гъилди эгечIнава лагьайтIани жеда. Мисал яз, ачух эфирдилай кьулухъ, 29-апрелдиз, РД-дин Гьукуматдин Председатель Абдулпатагь Амирханов Сергей Меликован тапшуругъдалди Докъузпара райондиз рекье гьатна. Ана кьиле фейи гуьруьшрикай, Дагъустандин гьукуматди кьибле райондиз гудай куьмекрикай гегьенш макъала и нумрада гьатнава. Республикадин руководство дагъустанвийрин яшайишдин шартIар хъсанарунив рикIивай эгечIнавайди къалурун патал тек са и мисал гъун бес я. Зи фикирдалди, вири региондин Кьиливай кIан хьунни дуьз туш. Хейлин крар чкайрал къуллугърал алай чиновникар чпин везифайрив жавабдарвилелди эгечIайлани, гьялиз жезва. ИкI тирди Сергей Меликова Махачкъалада кьиле фейи са совещанидални къейдна. Адан гафаралди, кIвалахдин жигьетдай чпин хивевай мажбурнамаяр намуслувилелди кьилиз акъуд тийизвай чиновникрин гьакъиндай кьетIи серенжемар кьабулдайвал я.
Мегьамед Ибрагьимов
