Инсандивай анжах гьакъисагъ зегьметдалди ва агъайнавилелди жемятдин патай гьуьрмет ва авторитет къазанмишиз жеда. Райцентрадин Гуьней пата яшамиш жезвай Абдуллаева Келимат бадени вичиз вирида гьуьрметзавай инсанрин жергедай я. Эгер адан зегьметдин ва уьмуьрдин рекьиз вил вегьейтIа, дикъет гуниз ва чешне къачуниз лайихлу делилар, рикIел аламукьдай чинар гзаф аквада. Ада гъвечIи чIавалай уьмуьрда гзаф четинвилер, азиятар, дяведин йисарин каш-мекь эхна.

Ватандин ЧIехи дяве башламишайла, ада тарсарикай азад вахтунда дидедиз колхоздин кIвалах­ра куьмекардай. А йисара зегьметдин йикъарай колхозчийриз складдай техил гузвай. Келимата фронтдин игьтияжар таъминарунин мураддалди, йифериз вичин дидедихъ галаз санал гуьлуьтар,бегьлеяр храз, гъалибвилик вичин пайни кутуна.Дяведилай гуьгъуьниз Къучагърин хуьруьн колхозда ва гуьгъуьнлайни Ахцегьа “Заря” совхозда фялевиле ва дояркавиле кIвалахна.Иесивилелди гелкъвезвай гьар са каликай, юкьван гьисабдалди, 1430 килограмм нек ацазвай кIвенкIвечи дояркадиз са шумудра гьуьрметдин грамотаяр, пулдин премияр ганай. Келимат бадедин шикил хейлин йисара совхоздин ва райондин Гьуьрметдин доскадал хьана.

Зегьметдин ветерандиз Гъалибвилин суварихъ галаз алакъа­лу яз са шумудра Россиядин Феде­рациядин Президент В.В.Путинан къул алай тебрикдин чарар хтана.Келимат баде фадлай пенсиядиз экъечIнава. Адахъ 4 рушни 2 гада ава. Ам вич гъвечIи га­да Зугьрабан хизандихъ галаз яшамиш жезва. Хтулриз (адаз 24 хтул ва 33 птул ава) чпин баде багьа я.Абуру адал мукьвал-мукьвал кьил чIуг­ваз­ва ва чпелай алакьдай куьмекар гузва.

— Келимат баде, куьн уьмуьрдин девлетлу тежриба авай, Со­­ветрин девирдин крар-къайдаяр акунвай камаллу кас я. ГекъигайтIа, исятда авай гьаларикай куьрелди вуч лугьуз жеда? —  хабар кьуна за

— Я чан бала, а вахтунда, яша­йиш четин тиртIани, къайда-ни­зам, адалат авай. Советрин властди чаз, дагъдин никIер яцаралди  цазвай кесиб дагъвийриз, гьич тахьай­тIа техил-фу гана. Жемят савадсузвилин мичIивиляй акъудна. А чIа­вуз инсанрихъ пакадин йикъахъ инанмишвал авай. Советрин девирдин кьилин агалкьунрикай сад ам тир хьи, власть халкьдинди хьана. Халкь кесибризни девлетлуйриз пайи-паярнавачир. А девирда вирибу­руз чпелай алакьдай кIвалахар жагъиз­вай. КIвалах тавун — айиб, сада-садаз гьуьрмет, хатур авун намусдин кар яз гьисабзавай…

Алатай йисуз Келимат бадедин 91 йис тамам хьана. Къуй адахъ гележегдани сагъламвал, хьурай!

Рагьидин Эминов