Массовый информациядин такьатрай малум хьайивал, Астрахандин областдин гимийрин “Лотос” тIвар алай заводда сиягьатдин цIийи теплоход гьазурунин кIвалахар куьтягьзава. Вичел “Петр Великий” тIвар эцигнавай и лайнер 2019-йисуз “Мостурфлотдин” ихтиярдиз вахкудайвал я. Гимидин транскаспийский сиягьатрин маршрутарни гиламаз гьазурнава.
Кар анал ала хьи, гьуьлерин туризмдин мад са цIийивал ва туристар патал къулайвал тир “Петр Великий” теплоход арадал атуни чи республикадани гьуьлерин туризм гегьеншаруниз куьмек гуда, гьикI хьи, адан “ЧIехи ипекдин рехъ” Каспийдилай башламишда — Бакудилай гатIунна, Москвадиз кьван. Бакудай теплоход Дербентдиз, анай Астрахандиз, ахпа Волга вацIай виниз — Волгограддай яна Саратов, Ульяновск, Казань, Нижний Новгород, Ярославль ва Углич шегьерриз. 12 йикъан сиягьат Москвада эхирдал къведа.
“ЧIехи ипекдин рекьяй” туристривай анжах 2020-йисалай сиягьат ийиз жеда.
Международный ва гьуьлерин туризмдин хатасузвилин вири истемишунриз жаваб гузвай “Петр Великий” лайнерда жуьреба-жуьре дережадин 155 каюта ава. Гимида 310 кас пассажирриз чкаяр жеда.
Нариман Къарибов
