Уьмуьрда чал ахьтин инсанар гьалтда хьи, абуру атIанвай рекьиз вил вегьейла, къилихдин кьетIен­вилер, и ва я ­ма­са месэладиз талукь инанмиш­вилер якъин жеда. Рафтарвал ­авурла, абур патав гвай инсанрив  эгечI­дай тегьер акурла, и фикир мадни мягькем, абуруз рикIин сидкьидай гьуьрмет авунин гьиссер пайда жеда. Ихьтин ксарикай сад   Жабраилов  Гьанифа  Жабраи­лович  я.

Гьанифа  1948-йисан 15-февралдиз Кьасумхуьрел дидедиз хьа­на.  Адан буба Жабраил  райондин гидрометеостанциядин начальник тир, диде Асията кIвал-югъ кьиле тухузвай,  аялар тербияламишунал машгъул тир. Дяведилай гуьгъуьнин четин вахтара хизан хуьн, аялриз дарвал такун  патал Жабраилани Асията гзаф зегьметар чIуг­вазвай. И карда абуруз авай ирид аялдини куьмек гузвай —  абуру патав гвай чилел  емишар, майваяр гьасилзавай, кIвалин кIвала­хар ийизвай.

Буба садлагьана рагьметдиз фейила, Гьанифади 9-классда кIел­завай.  ЧIехи хизандиз  им залан имтигьан тир — ам неинки багъри касдикай, гьакI кIвализ дуллух гъизвай таъминчидикайни магьрум ­хьана. Сад-садалай гъвечIи аялар гъилел алаз амукьай диде ийир-тийир хьана.

Амма рикI кудай инсанрин ­куьмекдалди  Гьанифа бубади зегьмет чIугур станцияда, диде консер­виярдай заводда кIвалахал акъ­вазна.

Вахтар акваз-такваз алатна. Школа акьалтIарай Гьанифа  халадин патав Каспийск ше­гьердиз фе­на. Ина адакай  “Дагдизель” заводда (ЗДД) фрезеровщикдин ученик хьана. Гьа са вахтунда ада Ленинграддин  гимияр расунин рекьяй­ институтдин (ЛКИ) Каспийскда авай филиалдин нянин отделенидиз  им­тигьанарни вах­кана.

1971-йисуз  армиядин жергейрай хтайдалай кьулухъ Гьанифа  “Даг­дизель” заводда кIвалахал акъвазна. Сифте йикъарилай ада вич гьам производствода, гьамни  жегьилрихъ галаз  общественный кIвалахра кьил-кьилеллай, кар алакьдай пешекар яз къалурна.

1973-йисуз  Гьанифа заводдин  комсомолрин тешкилатдин  кIвен­кIве­чи хьана — ам “Дагдизелдин” ВЛКСМ-дин  комитетдин секретардин заместителвиле хкяна.

Вуз акьалтIарайдалай кьулухъ Гь.Жабраилов “ЗДД” ОКБ-дин  инженер-констурктордин къуллугъдал тайинарзава. “Дагдизель” завод а йисара  вини дережадин пешекарвал авай инженервилин кадрияр гьазурдай  кархана  яз гьисабзавай. Виликан ва алай вахтунин чIехи майишатрин гзаф пай руководителри, алимри, илимдин жуьреба-жуьре идарайрин  муаллимри, общественный деятелри чпин зегьметдин рехъ гьа и карханадилай башламишайди я.

— Къизилдин вахт тир, — сесиник са тIимил пашманвал кваз лугьузва Гь.Жабраилова, вичин жегьил йисар рикIел хкиз. — Чи карханадин тIвар-ван вири уьлкведиз чкIанвай. Чна неинки гьакъисагъвилелди зегьмет чIугвазвай, гьакIни тамам яшайиш кьиле тухузвай — пулсузда­каз ва я лап ужуздаказ Советрин Со­юздин вири республикайриз физвай. Санаторийрани курортра ял ядай, кIвалер къачудай мумкинвал авай. Марифатдиз, савадлувилиз талукьарнавай ва  спортдин мярекатар кьиле тухузвай ва икI мад.

1981-йисуз партиядин ЗДД-дин комитетдин теклифдалди Жабраилов Каспийскдин горкомдин  промышленностдинни транспортдин  отделдин инструктордин къуллугъдал тайинарзава. И йисара ада кьилин  мад са образование къачузва — Ростовдин высший партшкола акьалтIарзава. ИкI, адан  везифайрин ва кIвалахдин майданар гегьенш жезва. Гила Жабраилова  шегьердин промышленностдизни транспортдиз талукь вири хилерал гуьзчивалзава.

Кьуд йис алатайла, кьетIен            гьалар арадал атун ва кадрияр бес тахьун  себеб яз, Гьанифа Жабраилов  Каспийскдин фу чрадай заводдиз директор яз рекье твазва. Мад са йис алатайла, адакай шегьердин халкьдин гуьзчи­вилин комитетдин председатель жезва.

Перестройкадин йисари социализмдин къайдадин гзаф  къурулушар, гьа жергедай яз  халкьдин контролни чукIурна. Гь.Жабраилова  шегьердин агьалийриз яшайишдин рекьяй къуллугъ  авунин хиле зегьмет чIугун  давамарна — сифтедай адакай директордин заместитель, гуьгъуьнлай муниципальный “Элегант” карханадин руководитель хьана. И къуллугъдаллаз  ада агьа­лийриз яшайишдин цIийи жуьредин рекьерай къуллугъ авунихъ, яшайишдин и кIвали тамамарзавай къуллугърин ери вини дережадиз хкажунихъ галаз алакъалу хейлин  ме­сэлаяр нетижалудаказ гьялзава. Кьилинди  ам я хьи, ада базардин алакъайрин шартIара гьатнавай вичин карханада  майишатчивилин гьахъ-гьисабар авунин къайда  гуьнгуьна туна. И четин девирда Гь.Жабраиловалай коллектив хуьз, хийирлу рекьер виликди тухуз, цIийи къуллугъар кардик кутаз алакьна.

2006-йисуз Гьанифа Жабраиловичакай РД-дин Государстводин яшайишдин инспекциядин Каспийск  шегьердин инспектор хьана. “Госжилинспекциядин асул месэлайрин  бинедаллаз, чна  яшайишдин кIвалер авай гьал ахтармишзавай, — лугьузва ада. — Яшайиш­дин­ фонд,  дараматар, инженервилин къурулушрин тадаракар ва кIва­­лерин патарив гвай чкаяр ишлемишунал ва къайдада аваз хуьнал, яшайишдин фондуник акатзавай кIвалер хуьнин ва ремонт авунин кIвалахар вахтунда тамамарунал, кIвалерин къене авай газдин тадаракар хатасуздаказ, кудай шейинин ва энергетикадин ресурсар, яд кьил-кьилеллаз ишлемишунал, яшайишдин кIвалерин фонд  сезондин вахтунда ишлемишиз, вахтунда гьазурунал гуьзчивалзавай”.

Шегьерда кьиле тухвай ахтармишунрин нетижада  и жигьетдай къайда чIурай хейлин дуьшуьшар винел акъуднай. КIвалерин къенепатан цлар маса чкайрал хутахунин, патавай алава кIвалер галкIур хъувунин, къанунрал амал тавуна, балхунар кIеви­рунин месэлайри Гь.Жабраиловак кьетIен къалабулух кутазвай, гьикI лагьайтIа, залзалаяр  хьайи чIавуз вири и крари  бедбахтвилерал  гъун мумкин тир. Гьаниз килигна, и йисара Гьанифа Жабраиловича инсанрихъ галаз гъавурда твадай кIва­лах, гуьруьшар гзаф кьиле тухванай.

2012-йисуз Гь.Жабраиловакай Каспийск шегьердин “КаспийТеплоСервис” ООО-да зегьмет хуьнин  ва хатасузвилин техникадин рекьяй кар алай инженер хьана. И кIвалах ада къенин йикъалди давамарзава­. Алатай йисан январдилай Гь.Жабраилов гьакI Каспийск ше­гьер­дин  агъса­къал­рин советдин председателни я.

Жабраиловрин  хизандин ар­хивда амай пишкешрин арада и ма­къа­ладин игитдин гьуьр­метдин грамотайри кье­тIен чка кьазва. Гьакъи­сагъ зегьметдай ва общественный кIвалахра активнидаказ иштиракунай ам “Дагдизель” за­воддин руководстводин, комсомолдин горкомдин ва обкомдин, Дагъустандин об­ластдин профсоюзрин советдин, министерствойрин, Каспийскдин администрациядин патай хейлин грамотайриз ла­йихлу хьана.

Уьмуьрдин юлдаш Сейранахъ галаз (ам “Дагдизель” заводдин инженер-конструктор я)  санал Гьанифа Жабраиловича бахтлу хизан кутуна. ЧIехи хва Жабраила,  ДГУ акьалтIарна, РД-дин зегьметдин ва яшайишдин рекьяй виликди финин министерствода  кар алай пешекар яз кIвалахзава. Кьвед лагьай хва Эльдара, руш Сабинадини ДГУ куьтягьна.

15-февралдиз Гьанифа Жаб­раилова,  багърийрин  ва  юлдашрин юкьва  аваз,вичин 70 йисан юбилей къейдзава. Чнани адаз хайи югъ теб­рикзава, яргъал ва бахтлу уьмуьр хьун алхишзава.

Ярали Магьамдалиев