Квез чидани?
Кацерин жинсиникай тир каракал винел патан акунрай машахдиз ухшар гьайван я. И вагьшияр Африкадин, Азиядин баябанлухра, къумлух ва кьериз кул-кусар авай чкайра яшамиш жезва. Бедендин яргъивилел 65-82 сантиметр жеда, заланвал — 11-20 килограмм. Рангуниз фикир гайитIа, и гъвечIи гьайван Кеферпатан Америкадин пумадиз ухшар я. Бязи чешмейри къейдзавайвал, тIебиатда тек-туьк дуьшуьшра чIулав рангунин каракаларни дуьшуьш жезва.
— Каракал туьрк чIалан “karakuIak” гафуникай хьанва, таржума авурла, “чIулав яб” лагьай чIал жезва. Гьакъикъатдани, абурун япарин кьулухъ пад чIулав я.
— Алимри тестикьарнавайвал, и йиртижийрихъ 9 жуьре ава.
— Каракал гзаф зиринг ва йигиндиз чукуриз алакьзавай гьайван я.
— Адет яз, каракалри секинвилелди уьмуьр кьиле тухуда.
— Каракалдивай лекьенди хьиз гъугъ ийиз жеда.
— Адет яз, каракалар чеб сифтедай вердиш хьайи магъарада са шумуд йисуз галаз-галаз яшамиш жеда.
— Варз тамам хьанвай каракалдин шарагдивай текдаказ къекъвез жезва, эгер хаталувал гьиссайтIа, гьасятда магъарадиз гьахь хъийида.
— Азияда авай каракалрин кьадар йисалай-суз тIимил жезва. Яру ктабдик кутуна, гьукуматди абурал гуьзчивал тухузва.
— Адет яз, и гьайванар гъуьрчез йифен береда экъечIда.
— Лекьенди хьиз, каракалдини вичин гъуьрч тарциз хкажда. И кар чпин ем маса гьайванрикай чуьнуьхун патал ийизва.
— ТIебиатда каракалар 10-15 йисуз яшамиш жезва.
«Лезги газет»
