И мукьвара зун гуьлуьшан гатфарин юкъуз дидедиз хьайи са касдал туьш хьана: Рамазанов Насруллагь Искендарович. Ам 1965-йисан 10-майдиз Кьасумхуьруьн райондин ЦицIерин хуьре чIехи хизанда дидедиз хьана. Аялрик кIубанвилин лувар неинки диде-бубадин муьгьуьббатди, гьакIни абур гуьзел ерийрал, тIебиатдал рикI алаз чIехи хьуни кутазвай. Колхоздин бригадир буба датIана чуьллерани багьлара жедай, диде лагьайтIа — аялрин къуллугьда.
Рамазановрин аялар гъвечIи чIавалай чпин везифаяр кьилиз акъудиз вердиш жезвай. Дуьзендиз куьчардай къарар акъудайла, ЦицIерин хуьрни агъуз эвичIуниз мажбур хьанай. Етим хьана амукьай сад-пуд кас шад тиртIани, чIехи пай пашмандиз, са вил кьулухъ ягъиз-ягъиз, куьч хьанай. Им рикIин зурба тIарвал тирди и кар гьисс авурбуруз лап хьсандиз чида. Насруллагьан хизанри Аламише — Эминхуьр хкяна. Хуьруьн мектеб куьтягьна, жегьилди Новочеркасск шегьерда эцигунрин пешедай кIелна. Ада хизан кутуна, веледар динжарна. Гила хтулрин дестек чIехи буба я. Ада алай залан аямда 35 касдиз кIвалах ганва. Насруллагь Махачкъалада эцигунрин мал гузвай карханадин сагьиб я. Гьина межлис-мел аватIа, гьина къуьн кутуна кIандатIа, Насруллагь гьана сифте жергеда аквада.
Къейд ийин хьи, Насруллагь неинки къанажагълу, гьакI девлетлу руьгьдин инсанни я. Лезги эдебиятдал, иллаки чи багъри “Лезги газетдал” адан рикI пара ала. Ам датIана кхьизва, кIелзава.
Заз иллаки хуш хьайи кар ам я хьи, адан кабинетдин са пIипI музей хьиз аквада. Ана дегь заманайрин къаб-къажах, рухвар, куьгьне алатар акурла, заз зи вилик ЦицIерин хуьруьн куьгьне кIвал квай хьиз хьанай.
Насруллагьан уьмуьр шегьерда физватIани, адан рикI гьамиша хуьре ава. Алай вахтунда Насруллагьа аниз 4 км. экверин линия чIугунва, рекьер къайдадиз хканва, ата-бубайрин мискIин ремонтнава, серкIверин арада аскIан хьанвай а кIвалин ракIарар ачухна, тIебиатдин гуьзел чкадал са гегьенш алачух янава.
Хуьрел чан хкун, аниз багърияр хтун патал чалишмиш жезвай и касди анжах са вичикай фикирзавач. Хкведай рекье зи вилерикай адан эквери ишигълаван хъувунвай ЦицIер карагзавай. Чи етим хьанвай вири хуьрерал чан хкидай кьегьалар мадни хьанайтIа, гьикьван хъсан жедай.
Гьар сеферда бубайрин хуьруьз хъфейла, а багьа ерияр акурла, Насруллагьан вилерикай аял вахтар карагда, адан руьгь шадвилив ацIуда, гуьзел тIебиатди гуя ам тилисимда твазва.
Насруллагь хьтин рухваяр, лезги чилин куьгьне хуьрера гьар са кIвалин акадал керпич аламай кьван, тама тар, хуьруьн булах, ацахьай мискIин, бубайрин гуьмбетар, жигъиррин гел, рагарал чархар язавай лекь амай кьван баябан хьанвай хуьрер садрани чи чилелай квахьдач. За ахьтин хуьрериз, абурал чан хкизвай рухвайриз, чи тарихдиз, кьил агъузна, икрамзава.
Гьуьрметлу Насруллагь Искендарович,
Ислягьвал хьуй, цавани, къугъваз, — чубарук.
Майдин суварарни хайи югъ ваз — мубарак!
Бикеханум Алибегова
