Чи ватанэгьлияр — гьар сана
Журналистикадин рекье вичихъ еке агалкьунар авай бажарагълу ватанэгьлийрикай сад Украинадин меркезда яшамиш жезвай Рена Рафиковна Назарова я. Ам тележурналист, жемиятдин деятель, сиясатчи, Украинадин журналистрин милли союздин векил, «Киевский форум» ток-шоудин автор ва ведущий я. Пешедиз талукь цIийивилерин, кьетIен программайрин автор яз, Киевда адан тIвар фадлай машгьур хьанва.
Р.Назарова 1983-йисан 24-майдиз Киев шегьерда карчидин хизанда дидедиз хьана. 2006-йисуз Т.Шевченкодин тIварцIихъ галай Киевдин милли университетдин журналистикадин факультет акьалтIарна. Адан буба Рафик Назарович Назаров Азербайжан республикадин КцIар райондай я.
Телевиденида ада 2004-йисалай кIвалахзава. И йисара ада жуьреба-жуьре передачаяр кьиле тухвана, 2009-йисалай “Перший громадский” каналдин кьилин редакторвал, 2012-2013-йисара “Киевский форум” газетдин шеф-редакторвал авуна. Алакьунар авай журналистди сифтедай Киевдин гьукуматдин телерадиокомпанияда, гуьгъуьнлай машгьур “ZIK” телеканалда кIвалахна.
2012-йисуз Украинадин Верховный Рададин депутатвиле адан кандидатура къалурнавай, амма сечкийрин вахтунда бес кьадар сесер тахьуникди ам кьвед лагьай чкадал хьана.
2014-йисуз Р.Назарова Киевсоветдин депутатвиле, гуьгъуьнлай информациядин сиясатдин ва рекламайрин месэлайрай и советдин комиссиядин секретарвиле хкяна.
“Киевдин форумди” шегьерэгьлийрин тIал алай месэлаяр къарагъарзавай ва абур гьялдай рекьер жагъуруниз куьмекзавай. Лезги журналистдин регьбервилик кваз кьиле физвай форумра Украинадин машгьур сиясатчийри, гьукумдин вилик-кьилик квай ксари, депутатри, жемиятдин тешкилатрин векилри, журналистри иштиракзавай. Агьалийрин яшайишдиз, къанунсуз эцигунриз, ЖКХ-диз, медицинадин къуллугъриз, сечкийриз талукь важиблу месэлаяр къарагъарзавайвиляй Р.Назаровадин телепередача агалун патал са шумудра алахъунар авурбурни хьана. “Чи халкьдин кьисмет анжах чи гъиле ава” келимаяр лозунгдиз элкъвей форумдин кIвалах жемиятдин тешкилатрин куьмекдалди давамар хъувуна.
Бажарагълу ва викIегь журналист Рена Рафиковна гзаф кьадар шабагьрин сагьиб я. Къуй адахъ мадни еке агалкьунар хьурай!
«Лезги газет»
