Дагъустандин здравоохраненидин министр Татьяна Беляевади хабар гайивал, республикада коронавирусдиз акси рапар ядай чкайрин ва мобильный бригадайрин кьадар артухарзава.
Адан гафаралди, къенин юкъуз медицинадин идарайра тIегъуьндиз акси рапар ядай 86 кабинет кардик кутунва, мобильный пунктарин кьадар ла-гьайтIа, 47-дал кьван гзафарнава.
Къейд ийин хьи, Махачкъалада коронавирусдиз акси рапар ядай са пункт Ленинский районда авай МФЦ-да ахъайнава. Ана шегьердин 1-нумрадин поликлиникадин пешекарри кIвалахзава.
Татьяна Беляевади алава хъувурвал, коронавирус чIехи яшара авайбур патал иллаки хаталу я. Гьавиляй здравоохраненидин министерстводин векилри сифте нубатда чпин яшар 60 йисалай алатнавайбуруз, ахпа амайбурузни рапар ягъуниз эвер гузва.
13-апрелдин делилралди, Дагъустанда COVID-19 тIегъуьндиз акси рапар янавайбурун кьадар 45 агъзурдалай алатнава.
«Лезги газет»
