Дагъустандин мулкунал цIийи жуьредин коронавирусдин инфекция чукIунин вилик пад кьун патал тешкилнавай оперативный штабдин заседанидал РД-дин Кьилин везифаяр тамамарзавай  Сергей Меликова республика целди таъминаруниз талукь яз арадал атанвай гьалариз баян гана: “Чина галаз-галаз 10 йикъан вахтунда  инсанар яшамиш жезвай чкаяр, сифтени-сифте чIехи шегьерар  целди таъминарунихъ галаз алакъалу четин месэлаяр арадал къвез хьана. Идахъ галаз алакъалу яз, къарарар кьабулунай ва абур кьилиз акъудунай жавабдарвал хиве тунвай оперативный штаб тешкилнай. Заз оперштабдиз кьиле тухванвай кIвалахдай чухсагъул лугьуз кIанзава”.

Гьа са вахтунда, региондин Кьи­­ли къейд авурвал, алай вахтунда кардик квай целди таъминарунин системади жуьреба-жуьре аварийрал гъизвай гьерекатрин вилик пад вахтунда кьадай, серенжемар кьабулдай мумкинвал гузвач.

КОР чиркин хьун ва агьалийрин кIвалерив чиркин яд агакьунин хата­лувал арадал атун себеб яз, са жерге чIехи шегьерар цикай атIудай къарар кьабулна. С.Меликова Махач­къа­ла, Каспийск, Избербаш шегьеррин руководителриз ва Къарабудахкент райондин кьилиз четинди тир и вахтунда шегьерэгьлийрив яд агакьарунин кIвалах теш­килунай ва шегьерар целди таъминарунин ме­сэла куьруь вахтунда — кьве сут­­ка­дин къе­не гьялунай чухсагъул­ лагьана.

“Ихьтин дуьшуьшар тикрар хъхьана кIандач, гьелбетда, амма руководстводилай и гьерекатриз та­лукь серенжемар вахтунда кьа­булиз­ алакьуни абурун кIвалаху­нин къайдада алатай ноябрдилай инихъ дегишвилер гьатнавайдакай лугьузва. Инлай кьулухъ чи вилик квай ме­сэ­ла четин гьалара нетижалудаказ  се­­ренжемар кьабулунин дурумлу система туькIуьру­ни­кай ва Дагъустан целди таъминарунин къурулуш вич дегишаруникай ибарат я”, — къейд­на С.Меликова. И ме­сэла федеральный дережадиз акъуднава, кIанза­май­ди талукь департаментрихъ галаз гьар патахъай ахтармиш хъувун я.

“Яд лазим тир кьадарра, гьакI­ни инсанрин уьмуьр ва сагъламвал таъминардай ери аваз агакьарун лазим я”, — къейдна ада.

«Лезги газет»