И йикъара РД-дин Гьукуматдин Председателдин заместителдин везифаяр вахтуналди тамамарзавай Анатолий Къарибова регьбервал гузвай махсус комиссия Дагъустандин Кьилин везифаяр вахтуналди тамамарзавай Сергей Меликован тапшуругъдалди Республикадин кожно-венерологический диспансердиз чкадал фена килигна.
РикIел хкин: са шумуд югъ идалай вилик соцсетра (Дагъустандин сегментра) азарлуйри и идара авай чIуру гьал раижнавай кадрияр чкIанвай.
Чпиз акур гьаларикай Анатолий Къарибова региондин Кьилиз доклад авуна. “1972-йисуз эцигнавай и дарамат 8 агъзур квадратный метрдикай, кьве корпусдикай ибарат я. Дараматдин гьал лап чIуруди я. Ремонт кьиле тухунин чарасузвал ава. Ам 2019-йисуз кьиле тухун пландик квай, а чIавуз сметани гьазурнавай. Гуьгъуьнлай, коронавирусдихъ галаз алакъалу яз, аниз Республикадин садакай масадак акатдай азаррин центрадин (РЦИБ) са шумуд отделение хкана ва ремонтдин кIвалахар кьиле тухуз хьанач. Проектдинни сметадин документрик алаваяр кухтун лазим къвезва, гьикI хьи, ана вири гьисаба кьунвач”, — хабар гана врио вице-премьерди.
Малум хьайивал, 24-мартдилай аниз цIийи азарлуяр кьабулунин кIвалах акъвазарда. Аялар ва чIехибур анай РЦИБ-диз ахкъудунин фикирдал атанва. Са шумуд гьафтедин вахтунда абур къатканвай корпус азадда. Ахпа ремонтдин кIвалахрив эгечIда. Арадал атанвай гьалариз баян гуналди, Сергей Меликова малумарна хьи, кIелунин ва медицинадин идараяр ихьтин гьалдиз гъун дуьз туш, гьикI хьи, абур инсанар, сифте нубатда, аялар патал я. Талукь тирвал, анра шартIарни къулайбур тешкилун лазим я.
«Лезги газет»
