Вакцина ахъайда
Коронавирусдиз акси Россиядин “Спутник V” вакцина ругуд-ирид гьафтедилай ЕС-диз ахъайдайвал я. Ихьтин фикир Европадин духтуррин гьамишан комитетдин векилди лагьана, хабар гузва “Лента.ру” чешмеди.
“Санлай къачурла, “Lancet” журналда чапнавай нетижаяр рази жедайбур я, абуруз чна ихтибар ийизва. ЕМА-дин (Европадин дарманрин такьатрин агентство) делиллу ахтармишунрал асаслу яз, чавай вакцина ахъайиз жеда”, — лагьана векилди.
Къейд ийин, ЕМА-ди Россиядин “Спутник V” ахтармишунин кIвалахар 4-мартдиз башламишнай.
Евросоюзда регистрация авунин гьерекатарни гуьзет тавуна, Венгриядини Словакияди “Спутник V” ишлемишун кьабулнава. Малум тирвал, тIвар кьунвай вакцина алай вахтунда дуьньядин 50 уьлкведа регистрация авунва. Россиядин алимрин вакцина алай вахтунда ВОЗ-дин лап хъсан цIудакай сад я.
Базадиз цIай гана
Сириядин Дейр-эз-Зор вилаятда авай США-дин военный базадиз ракетайрай цIай гана. “AI-Mayadeen” телеканалдин делилрал асаслу яз, идан гьакъиндай “Новости” РИА-ди хабар гузва.
Къейдзавайвал, цIай ни ганвайди ятIа гьелелиг малум туш. Виликамаз раижнавай малуматрал асаслу яз, аскеррикай бязибуруз хасаратвилер хьанва. Хирер хьанвайбурун дуьм-дуьз кьадар тайинариз хьанвач.
Алай вахтунда Сириядин Хасеке, Дейр-эз-Зор ва Ракка вилаятар “Сириядин демократиядин къуватрин” гуьзчивилик ква. Абур куьрдерин, арабрин ва ассирийви аскеррикай ибарат я. США-дини гьабурун тереф хуьзва. 2015-йисалай инихъ США-ди и магьалра 9 база арадал гъана.
Умуми везифа
Россиядин МИД-дин кьил С.Лаврова къейд авурвал, ООН-дин уставдин принциприн тереф, адалат хуьн патал Россиядини Китайди сад хьтин фикирдал алай ксар кIватIун герек я. Адан фикирдалди, им кьве уьлкведин умуми везифа я. Ихьтин фикир С.Лаврова Китайдин МИД-дин кьилихъ галаз ихтилатар кьиле тухвай вахтунда малумарна, хабар гузва “Новости” РИА-ди.
ЕС-дин аксивилер
ЕС-ди Чечнядин вице-премьер, “Терек” подразделенидин командир А.Висмурадоваз ва Аргун шегьердин полициядин виликан начальник А.Катаеваз акси яз санкцияр кардик кутунва, хабар гузвай “Новости” РИА-ди.
Санлай къачурла, ЕС-диз Россиядин 11 ватандашдиз ва 4 тешкилатдиз акси яз санкцияр кардик кутаз кIанзава. Къейдзавайвал, гуя абуру инсанрин ихтиярар чIурзава.
Адалай вилик ЕС-дин къецепатан крарин министррин Советди Россиядин, Китайдин ва Ливиядин 11 ватандашдиз акси санкцийрин сиягь тестикьарнай. ЦIийи санкцияр талукьарзавай россиявийрин тIварар раижзавач.
Менфятлу нагьар
Медицинадин илимрин кандидат, духтур-пегьризчи А.Бобровскийди менфятлу нагьардин сирер ачухнава. Вичин фикирар ада “Sputnik” радиодиз интервью гайи вахтунда раижна.
Адан фикирдалди, тамамдаказ тух хьун патал бедендиз бес кьадарда углеводар, пи ва белокар герек я. Пешекарди незвай затIарин са пай емишрикай ибарат хьун лазим яз гьисабзава, кьудай са пай — ризкьидикай (хапIа, фу), мад кьудай са пай — якIукай ва я маса белокрин суьрсетрикай.
Бобровскийдин гафаралди, экуьнахъ нагьар ийидайла, ширинлухар ишлемишун хъсан туш. Ада къейд авурвал, емишрик, майвайрик инсандин бедендиз зарар тагудай шекер ква. Гьелбетда, недайла кьадарни чир хьун рикIелай алудна виже къвезвач.
Идалай вилик пешекар О.Деккера виридалайни менфятлуди мержемекрин хуьрек тирди малумарнай.
Хъсан смартфонар
“Роскачество” тешкилатдин сайтди хабар гузвайвал, лап хъсан смартфонрин сиягь цIийи хъувунва.
Кьилди къачуртIа, тешкилатдин пешекарри лап хъсан смартфонрин жергедиз 11 аппарат алава хъувунва, абур 2020-йисан эхирра ва 2021-йисан сифте кьилера акъуднавай цIийибур я. Сад лагьай чкадал Samsung Galaxy S21 Ultra, кьвед ва пуд лагьай чкайрал Huawei Mate 40 Pro и OnePlus Nord N10 ала. Лап хъсан ругудан жергеда Samsung Galaxy S21+, Samsung Galaxy S21 ва Xiaomi Redmi Note 9T ава. Россияда алатай йисан юкьварилай инихъ гзафни-гзаф маса къачузвай модель Samsung Galaxy M31 яз гьисабзава.
«Лезги газет»
