Камилов Абидин (Куьре Абид) 1951-йисан 20-мартдиз Кьасумхуьруьн (гилан Сулейман-Стальский) райондин Асалдхуьре Ватандин ЧIехи дяведин инвалид Саидан лежбер хизанда дидедиз хьана.
1969-йисуз Шихидхуьруьн юкьван школа акьалтIарна. 1971-1973-йисара Советрин Армиядин жергейра къуллугъна. 1979-йисуз ДГУ-дин филологиядин факультет яру дипломдалди акьалтIарна. Гьа са вахтунда ана журналистикадин отделенини куьтягьна. Испикрин юкьван школада муаллимвиле кIвалахна. Жегьил пешекаррин кьитвилиз килигна, адаз райондин виликан “Коммунизмдин гатфар” газетда кIвалахун теклифна. 1980-йисан майдин вацралай инихъ райондин газетда кIвалахзава. Ам анин культурадин отделдин заведующий я.
Гьеле школада кIелзамаз шиирар, къаравилияр, очеркар, макъалаяр кхьиз хьайи, ДГУ-да кIелдайла, филологиядин факультетда лезги чIалалди акъудзавай (чи халкьдин эдебиятдин, медениятдин ва тарихдин месэлайриз талукьарнавай) “Самур” (гуьгъуьнлай “Чешме”) цлан газетдин редактор яз хьайи адан эсерар 1969-йисалай инихъ райондин ва республикадин лезги газетризни журналриз, урус чIалаз элкъуьрнавай шиирар “Дагестанский университет” газетдиз акъатиз гатIунна. Адакай Дагъустандин жегьил писателрин 6-совещанидин делегатни хьана.
Абидин Камилова райондин центральный библиотекадин патав алатай асирдин 80-йисара эдебиятдин “Чешме” тIвар алай кружок тешкилна, яратмишдай къуватар агудна. Шаир 1990-йисуз Сулейман-Стальский районда “Куьредин ярар” тIвар алай общественный культурадин центр тешкилай ва адаз тайин вахтунда регьбервал гайибурукай сад я. Ам алай вахтундани и центрадин комитетдин член, лезги писателрин Союздин райондин отделенидин председателни я.
Абидин Камилова вичикай, хсуси хатI ва бажарагъ авай шаирдикай хьиз, гьеле алатай асирдин 80-йисарилай хабар гана. Адан эсерар мукьвал-мукьвал районрин, республикадин лезги газетризни журналриз акъатзава. Адан цIудралди шиирриз пешекар ва гьевескар композиторри манийрин авазар теснифнава. Абур халкьди еке ашкъидивди кьабулзава.
Абидин Камилов 15-дав агакьна шииррин ва гьикаятдин ктабрин сагьиб я. И йикъара, 70 йисан юбилейдин вилик, Абидин Камилован “Манияр — зи руьгьдин лувар” (урус чIалал) ктабни чапдай акъатна (гьазурайди ва лезги чIалай урус чIалаз таржума авурди — А.Омаров).
Районда ва адалай къецени кьиле физвай культура¬дин, общественный маса мярекатрик кьил кутазвайди, активный иштиракчи тир адаз гзаф йисарин намуслу зегьметдай ва республикадин вилик лайихлувилерай 2002-йисуз “Дагъустандин культурадин лайихлу работник” лагьай гьуьрметдин тIвар гана.
А.Камилов гьакIни университетда кIелзавай йисара гайи СССР-дин кьилин ва юкьван образованидин министерстводинни ВЛКСМ-дин ЦК-дин “За отличную учебу”, Советрин Ислягьвилин фондунин значокрин сагьиб я.
Адан гзаф йисарин намуслу зегьмет са шумуд сеферда РД-дин министерствойринни ведомствойрин, Сулейман-Стальский райондин администрациядин гьуьрметдин грамотайралди къейднава.
“Лезги газетдин” редакциядин коллективди Абидин Саидовичаз уьмуьрдин 70-гатфар рикIин сидкьидай мубаракзава. Къуй ви уьмуьрдин гьар са легьзе гатфар хьиз гуьлуьшан ва иер хьурай, гьуьрметлу шаир!
«Лезги газет»
