Тамам са варз идалай вилик Каспийскда, Къ.Къурамегьамедован тIварунихъ галай спорткомплексда, 2000-2007-йисара дидедиз хьанвай гадайринни рушарин арада армрестлингдай республикадин кIвенкIвечивал, Дагъустандин сад лагьай чемпион, РФ-дин спортдин мастер Ш.Омарован призар патал акъажунар кьиле фейидакай ва республикадин жуьреба-жуьре районрайни шегьеррай тир 150-далай виниз гъвечIи спортсменри чпин гъилерин къуватлувал къалурайдакай, аниз Сулейман-Стальский райондин спортдин, туризмдин ва жегьилрин крарин рекьяй комитетди армрестлингдай дуьньядин ва Европадин чемпион, РФ-дин лайихлу тренер Малик Тагьирбегован регьбервилик кваз 22 спортсмендикай ибарат команда рекье турдакайни, санлай жаванри къазанмишнавай нетижайриз килигна, райондин команда 1-чкадиз лайихлу хьайидакай хабар ганай.
Мукьвара спортдин и жуьредай Россиядин кIвенкIвечивал патал Орел шегьерда кьиле фейи акъажунра чи уьлкведин 44 региондай 600-дав агакьна спортсменри чпин гъилерин къуватар ахтармишна. Сулейман-Стальский райондин спортдин, туризмдин ва жегьилрин крарин рекьяй комитетдин кьил Надир Эфендиева хабар гайивал, и акъажунра иштиракай Равил Тагьирбегов 60 кг-дал къведалди заланвал авайбурун арада (тренер — Малик Тагьирбегов) гьам эрчIи ва гьамни чапла гъилелди (кьве разделдай) 1-чкадиз лайихлу хьана. Рушарин арада Амина Салагьовади 3-чка кьуна.
Гила абуру алай йисан сентябрдиз Батуми шегьерда дуьньядин кIвенкIвечивал патал кьиле фидай акъажунриз гьазурвал аквадайвал я.
Чи мурад жегьилар анайни гъалибвал къачуна хтун, гележегда абурухъ спортдин рекье мадни кьакьан кукIушар муьтIуьгъардай къуватар хьун я.
Чи мухбир
