Экономикадин гьакъикъи секторда производство тешкилнавай карчийриз государстводин патай авунвай харжийрин са паюниз барабар субсидийрин куьмек къачудай мумкинвал ава. Субсидияр гунин кIвалах РД-дин экономикадин ва мулкар виликди тухунин министерстводи государстводин “Дагъустан Республикадин дагълух мулкар яшайишдинни экономикадин жигьетдай виликди тухун” программадин сергьятра аваз кьиле тухузва.
И программа республикадин дагълух мулкара суьрсет гьасилунин карда куьмек гунихъ элкъуьрнава. Адан бинеда дагъвийрин дуланажагъ яшайишдинни экономикадин жигьетдай хъсанарун, хуьрерин агьалияр шегьерриз куьч хьунин вилик пад кьун ава.
Субсидия къачуник гьакIни хсуси майишатрин иесийривай умуд кутаз жеда. Абуруз куьмек гъвечIи жуьредин техника (векь ядай, дуьдгъвер хкуддай тадаракар, культиватор ва мсб.) маса къачуниз ийизвай харжийрин тайин пай эвез хъувуналди гуда.
Субсидийрин куьмек къачун патал РД-дин экономикадин ва мулкар вилик тухунин министерстводив тайин жуьреда кхьенвай арза ва лазим са жерге документар агакьарун герек я. Къейд ийин, и кар РД-дин МФЦ-дин филиалрин куьмекдалди ийиз жеда. Важиблуди ам я хьи, арзаяр гьич тахьайтIа эхиримжи пуд йисан вахтунда производстводал машгъул карчийривай кьабулда.
Арзаяр кьабулиз 9-мартдиз башламишнава ва 2021-йисан 11-майдалди давам жеда. Конкурсдин серенжемрин нетижада такьатар амукьнаваз хьайитIа, конкурс давамар хъийида ва цIийи вахт эхцигда. Гьа са вахтунда, арадай акъудиз жедай себебар аваз, конкурсдай акъат тавур карчийриз арза мад сеферда хгудай мумкинвал жеда.
Идалайни гъейри, алай йисуз, Дагъустанда сифте сеферда яз, ветеринар, агроном, зоотехник, хуьруьн майишатдин механизатор яз дагълух мулкара кIвалахиз кIанзавай арандин агьалийризни куьмек гун фикирда кьунва. Абуруз са сеферда пулдин куьмек гудайвал я.
«Лезги газет»