Дагъустан Республикадин “Зи Дагъустан — зи рекьер” кар алай программадин сергьятра аваз 2021-йисуз, санлай къачурла, 270 километр тешкилзавай 400 куьче ремонтда, хабар гузва РД-дин транспортдин ва рекьерин майишатдин министерстводи.
“2021-йисан бюджет туькIуьрдайла, муниципалитетрин куьчеярни шегьреяр ремонт авуниз субсидияр яз 1 миллиардни 353 миллион манат чара авун фикирда кьунва. Идакай 8 шегьердиз — 810,25 миллион манат, 41 муниципальный райондиз 542,8 миллион манат рекье твада”, — къейдна идарадин векилди.
РикIел хкин, алатай йисуз кар алай проектдин сергьятра аваз регионда, санлай къачурла, 263 километр тешкилзавай 384 куьче ремонтнава. Шегьеррин округрив ва муниципальный районрив и макьсаддалди агакьарнавай субсидийрин санлай къачур кьадар 1 миллиардни 287 миллион манатдиз барабар я. 2019-йисуз лагьайтIа, транспортдин налог яз кIватIнавай такьатрихъ Дагъустандин шегьерра ва муниципалитетра, санлай къачурла, 149 километр тешкилзавай 184 куьче ремонтна.
Идалайни гъейри, “Хъсан еридин ва хатасуз шегьреяр” милли проектдин сергьятра аваз алай йисуз Дагъустан Республикада региондин важиблувал авай ва, санлай къачурла, 51 километр тешкилзавай автомобилрин шегьреяр ремонт авунин ва я цIийикIа туьхкIуьр хъувунин кIвалахар кьиле тухуда. ГьакIни, кьилди къачуртIа, Махачкъалада, санлай къачурла, 54 километр тешкилзавай куьчеярни шегьреяр ремонт, бязи чкайра капитальнидаказ ремонт ийида. Федеральный ва региондин бюджетрай и рекьериз 2412,85 миллион манат чара авунва.
Алай йисуз региондин важиблувал авай вад шегьредин участокар хатасузвилин ва къулайвилин жигьетдай истемишунрив кьадай гьалдиз хкида. Абурун жергеда Манаскентдин патавай физвай ва “Каспий” санаторийдив агакьарзавай 4 километрдин шегьрени ава, ам, цIийикIа туьхкIуьр хъувуна, ишлемишиз вахкун 2022-йисан пландик кутунва.
Идалайни гъейри, рекьерин гьерекатрин хатасузвал артухарун патал 2021-йисуз республикадин важиблувал авай шегьрейра 10 видеокамера эцигда ва транспортдин такьатрин заланвилел гуьзчивалдай са пункт туькIуьрда.
«Лезги газет»
