21-мартдиз Ахцегьрин хуьре Дагъустандин халкьдин писатель Къияс Межидован 110 йис тамам хьуниз талукьарнавай шадвилин мярекатар кьиле фида. Идакай “Лезги газетдиз” Ахцегь райондин администрациядин пресс-къуллугъди хабар гана.
Мярекатрин иштиракчияр патал писателдин кIвале-музейда сиягьат тешкилда, край чирдай музейда адан яратмишунрин выставка ачухда, Ахцегьрин кьилин ктабханада юбилейдиз талукьарнавай конференция кьиле фида.
Къияс Межидов лезги халкьдин рикI алай писателрикай сад я. Адан машгьур “Кьашкьа духтур” роман кIел тавур кас Лезгистанда тек-туьк гьалтда.
Къейд ийин хьи, алай йисуз Ахцегь райондин кьиле авайбуру писателдин тIварунихъ галай куьче аваданламишун, ана къир цун фикирда кьунва. Къияс Межидован экуь къамат рикIера хуьнин мураддалди Ахцегь райондин вири мектебра писателдин эсерар чирунай махсус мярекатар кьиле тухудайвал я.
«Лезги газет»
