Дагъустанда гьуьлуьн къерехра ва федеральный хсусиятда авай чилериз талукь тамам делилар кIватIунин кIвалах гегьенш майданра башламишнава. И кардин себеб республикада туризмдин хел вилик тухун патал инвестицийрин жигьетдай къешенг чкаяр жагъурун я, хабар гузва РД-дин чилерин ва эменнидин алакъайрин министерстводин пресс-къуллугъди.
И кIвалах РД-дин “Дагтехкадастр” ГБУ-дин, РД-дин туризмдин, Дагъустандин чилерин ва эменнидин алакъайрин министерстводин ва Росимуществодин РД-да авай территориальный управленидин векилри кьиле тухузва.
Министерстводи хабар гузвайвал, алай вахтунда гьуьлуьн кьерен чилер гьисабдиз къачунин кIвалахар Къарабудахкент, Мегьарамдхуьруьн, Къаякент ва Дербент районра кьиле тухвана акьалтIарнава. И кIвалахар амай чкайрани давамарда.
Кьиле тухванвай кIвалахрин нетижайриз талукь делилар РД-дин чилерин ва эменнидин алакъайрин министр Заур Эминова РД-дин Кьил Сергей Меликован “Дагъустан Республикадин хсусиятда авай чилерин ресурсар идара авунин ва менфятлудаказ ишлемишунин нетижалувал артухарунин гьакъиндай” (2020-йисан 11-ноябрь, 107-рг) тапшуругъ кьилиз акъудунин сергьятра аваз гьазурзавай докладда раижда.
Къейд ийин, эхиримжи вахтара гьуьлуьн кьер къулай гьалдиз гъунин ва михьи авунин месэлайриз кьетIен фикир гуз башламишнава. ИкI, чна идалай виликни хабар гайивал, Республикадин халкьдин общественный фронтдин активистри, “Каспийский природоохранный центр” АНО-ди ва ДГУ-дин экологиядинни дурумлудаказ виликди финин институтди санал Каспий гьуьлуьз авахьзавай чиркин ятарин карта туькIуьрунин проект кьилиз акъудзава.
И серенжемрин макьсад республикада туристар, ял ядайбур патал къулай шартIар туькIуьриз алахъун я. ГьикI лагьайтIа, эхиримжи вахтара Дагъустандиз сейр ийидайбурун кьадар йисалай-суз артух жезва. И хилез кьетIен фикир гунин тереф республикадин кьиле авайбуруни хуьзва. ИкI, РД-дин Халкьдин Собранидин 55-сессиядин вахтунда депутатри туризмдин хиле зегьмет чIугвазвай карчийрилай къачузвай налогдин агъуз тир (1 процентдив агакьна) ставка тестикьарнава.
Ставкадин кьадар агъузарунин теклиф алатай йисан эхирра РД-дин Кьилин везифаяр вахтуналди тамамарзавай Сергей Меликова ганай. Адан гафаралди, и серенжемди республикада туризмдин хел вилик тухунин кардик гьерекат кутада. Санлай къачурла, Сергей Меликова вилик туриствилинни ял ягъунин кластер туькIуьрунин ва Дагъустанда мугьманриз ийизвай къуллугърин ерилувал артухарунин месэлаяр эцигнава.
«Лезги газет»
