Акьалтзавай несилдиз тербия гунин карда кьилин чка, гьелбетда, дидед чIала кьазва. Ам чирунин асул бинени хизанда ава. ЧIал сифтени-сифте хизанда хьана кIанда, школада аялдиз кIелиз, кхьиз чирдайвал.
Шегьердин школада чIал течир аялдихъ галаз кIвалахун гзаф четин я. Шегьерар анихъ амукьрай, хуьрерани гзаф аялар урусдалди рахазва. Лезги сесер лугьуз жезвач. Гьи миллет я лагьайла, вирида “зун лезги я” лугьун ийизва. Лезги чIалал рахаз тежезвайла, лезгивал квелди тестикьарда?..
Аялриз урус тIварар гузвай дуьшуьшар гилани амазма. ЧIехи хьайила, бязи аялри чпин урус тIварар дегишарзава. Бес тIвар эцигдайла диде-бубади фикир гун лазим тушни?
Дидед чIал течир касдиз бубайрилай атай адетар, лезгийрин меденият, эдебият чир жедач. Абуру хийир-шийирдин крарани чеб урусри ва я маса миллетри хьиз тухуда. РикI тIар жедай кар ам я хьи, бязи лезгийриз чпин чIалал кIелна кIандач, аялар урус чIалал чапнавай Дагъустандин литературадиз фирай лугьузва.
Ахьтин диде-бубайриз са чпин ванцелай гъейри, маса са касдин ванни къвез кIан жезвач. Гьахьтин лезгийриз чизвач хьи чIал авачир халкь тежедайди. Абуру, чIал ва халкь хуьдай чкадал, абур квахьуник къуьн кутазва. За гъвечIи классрин аялризни тарсар гана, тарихдин тарсарни тухвана. Жуван чIалал рикI алайвиляй, алай вахтунда лезги чIалан ва литературадин тарсар гунал элячIнава.
Гьуьрметлу лезгияр, гьуьрметлу диде-бубаяр,вахар-стхаяр, за квевай тIалабзава: виш йисаралди чи диде-бубаяр рахай, чав агакьарнавай дидед чIалакай — лезги чIалакай аялар магьрум ийимир!
Мариян Бугаева
