Фейзудин Нагъиеван — 70 йис

Шаир ва публицист, филологиядин илимрин доктор  Фейзудин  Рамазанович  Нагъиеван  яшар 70-дав агакьнава. Яратмишдай кас патал лап чрай ва гьакьван феслу, сеслу чIалар кIел­завайбуруз теклифдай вахт. Чи юбилярди вич и рекьерай, гьам шаир ва гьикаятчи, гьам публицист ва литературани хайи чIал ахтармишзавай алим хьиз, вири дережайра устадвал авай автор (кирам) тирди субутнава. Гьар са рекье­ адахъ вичин хатI, гаф, къилих авайди тайин я. Чавай са гаф алава ийиз жеда: Фейзудин Нагъиева вич ариф­дар СтIал Сулейманан багъдин бажарагълу ва аниз вафалу билбилрикай сад тирдал дамахзава. Чнани и кардиз барка лугьузва.

Ам Агъа СтIалдал муаллимдин хизанда хана, чIехи хьана. СтIал булахри ам аял чIавалай чпел гьейранарна, мани лугьуз вердишарна.

Ада хуьруьн мектеб, Одессадин эцигунардай инженеррин институт, Москвада Литинститут, гуьгъуьнлай аспирантурани, докторантурани куьтягьна. Сифте илимрин кандидатвилин, ахпа докторвилин дережаярни хвена.

Публицист яз, ада вичин харжийрихъ “Лезгистан” журнал тешкилна, адаз редакторвална.

“Садвал” гьерекатдин, “Шарвили” тIвар алай милли медениятдин бинеяр арадал гъуник вичин лайихлу пай кутуна. Маса рекьерайни къейд авуниз лайихлу алакьунар пара я.

Автордин “Капал кхьинар”, “Къванцел биришар”, “Терсепулда йиф”, “Алпандин суракьда”, “Гарал теменар”, “Абилейсан марф” ва ма­са ктабар кIелдайбуру хушвилелди кьабулнава. Хейлин чIалар халкьдин манийриз элкъвенва…

Литературадин илимда адан гъиликай хкатнавай “СтIал Саяд”, “СтIал Сулейманан шииратдин ирс”, “Етим Эминан рехъ”, “Садвал рикIеваз” ва маса ктабрихъни монографийрихъ кьетIен метлеб авайди чи общественностди дериндай къейднава.

Хейлин чIалар ва гьикаяяр, публицистикадин макъалаяр маса хал­­кьарин чIаларизни таржума аву­на, чапдай акъатнава. Яни автордин яратмишунрин майданар генгбур, дамахлубур я.

Адан зегьметдиз государстводи ва  чи общественностдини кутугай къимет ганва. Ам “РД-дин культурадин лайихлу работник” лагьай­ гьуьр­метдин тIварцIин, “Шарвили” эпосдин, “Лезги газетдин” сад лагьай­ ре­дактор Гьажибег Гьажибегован премийрин лауреат, гзаф конкурсринни выставкайрин гъалибчини я.

Мердали Жалилов

 

* * *

Чун инанмиш я, Фейзудин На­гъиеван вилик гьеле ачух хъийидай аршар гзаф кума. А рекье чаз чи юбилярдихъ чандин сагъвал, руьгьдин мягькемвал, къелемдин хцивал хьана кIанзава.

Гьисаб мийир гьеле яшар,

Вилик кума кьетIен аршар.

Таъсибда хьухь тIварцIин лезги,

Алмасдинди кьуна верги.

 

Амазмай кьван вилин кьатIун,

Явашармир на чIал атIун!

Яшамишрай СтIал булах,

Чешмеяр хуьз, ая кIвалах!..

“Лезги газетдин” редакциядин коллектив.