И йикъара Кьурагьа, 8-Мартдин сувариз талукьарна, волейболдай нубатдин турнир кьиле тухвана. Идакай “Лезги газетдиз” райондин администрациядин пресс-къуллугъди хабар гана.
Турнирдин макьсад Кьиблепатан Дагъустанда спортдин и жуьре машгьурун, волейболдал машгъул жезвай рушарин кьадар ва устадвал хкажун, республикадин дережада кьиле тухузвай акъажунра иштиракдай викIегьбур хкягъун ва спортсменрин арадани дуствал мягькемарун тир. Алай йисуз и турнир машгьур насигьатчи, тренер, РД-дин лайихлу муаллим Абдурашид Мусаевич Абдурагьманован экуь къаматдизни бахшнавай…
Къизгъин къугъунрин нетижада 1-чкадиз Ахцегь райондин рушарин команда лайихлу хьана. Талукь тирвал, 2 ва 3-чкаяр Кьурагь райондин ва къадим Дербент шегьердин рушарин командайри кьуна. КIвенкIвечи чкаяр кьур вири командайриз кубокар, дипломар, грамотаяр ва пулдин пишкешар гана.
Турнирда Заира Гьуьсейнова (Кьурагь), Гуьлназ Алиева (Ахцегь) ва Милана Рагьимова (Дербент) виридалайни хъсандиз къугъвайбур яз гьисабна, абурун устадвални пулдин премийралди къейдна.
Гъалиб хьайи командайрив шабагьар вахкудайла, Кьурагь райондин администрациядин физический культурадин, спортдин ва жегьилрин крарин рекьяй отделдин начальник Рамиз Рамазанова, сувар тебрик авунихъ галаз сад хьиз, спортдани рушарихъ гележегда еке агалкьунар хьун алхишна.
«Лезги газет»
