Белоруссияда — “Спутник V”

30-31-мартдиз Белоруссиядиз Россиядин “Спутник V” вак­цина акъудунив эгечIиз кIанзава. Белоруссиядин здравоохраненидин министерстводин делилрал асаслу яз, идан гьа­къин­дай “ТАСС” чешмеди хабар гузва.

Алай вахтунда виликамаз Россияда ахтармишунар кьиле тухузва, мартдин эхирдилай башламишна, гьар вацра 500 агъзур доза арадал гъун фикирдиз къачунва.

ВОЗ-дин кьили Россиядин “Спутник V” вакцинадиз еке къимет­ ганай. Адалайни гъейри, Россияда “ЭпиВакКорона” вакцинани­ ре­гистрация авунва. Машгьур хьунин жигьетдай “Спутник V” вакцинади дуьньяда кьвед лагьай чка кьазва. Сад лагьай чкадал дуьньядин 49 уьлкведи разивилелди кьабулнавай “AstraZeneca” вак­цина ала.

Кибергьужум

Мукьвал тир 2-3 гьафтеда США-диз Россиядин гьукумдаррин къенепатан системадал кибергьужум кьиле тухуз кIанзава. Америкадин чешмейрал асаслу яз, идакай “Лента.ру” сайтди хабар гузва.

Гуя Россиядин хакерри авур гьужумриз жаваб хгузвайди я лугьуз, америкавийри са жерге серенжемар кьабулун кьетIнава. Россиядин терефди США-ди и жигьетдай кутазвай тахсирар са бинени авачирбур тирди тестикьарнай.

США-дин президент Байденаз гележегда гьукуматдин компьютеррин системаяр кибергьужумрикай хуьниз талукь махсус къарар акъудиз кIанзава.

Санал кьиле тухуда

Россиядини Белоруссияди мартдиз саналди ВДВ-дин иштираквал авай тактический серенжемар-вердишвилер кьиле тухуда. Идакай чи уьлкведин оборонадин министерстводи малумарнава, хабар гузва “Новости” РИА-ди.

Серенжемда Россиядин ВДВ-ди ва Белоруссиядин махсус операцийрин кьушунри иштиракда. Россиядин мулкарал кьиле фидай вердишвилерин серенжемрал 400-далай гзаф Россиядин ва Белоруссиядин военный 80 къуллугъчи, гьакIни 100 техника, 2 Ми-24 вертолет ва 6 Ми-8АМТШ желбдайвал я.

Умуддикай магьрумна

США-дин верховный судди виликан президент Д.Трампан эхиримжи арза кьабулнач. Арзада ада Байдена гуя сечкийра гъалибвал адалатсуздаказ къачунвайдакай лагьанва. Идалай вилик февралдин вацра мад кьве арза кьабул тавуна амукьнай. Эхиримжи арзада ада Висконсин штатда кьиле фейи сечкийрилай наразивал­ къалурнавай. Ана кьиле фейи сечкийрин нетижада Байденахъ гьахълудаказ 20 агъзурдалайни артух сесер хьанвайвиляй судди Трампан эхиримжи арзани кьабул тежедайди яз гьисабна. Им Трампан эхиримжи умуд тир, гила гьадакайни магьрум хъхьана.

Къайи кофе хъун теклифзавач

Духтур-пегьризчи Н.Диановади “Sputnik” радиодай къайи кофедин хаталувиликай суьгьбетна. Пешекардин фикирдалди, кофедик нек ва къаймах кутурла, ана микроорганизмаяр арадал атунин хаталувал артух жезва. Гьавиляй ада ихьтин кофе сятдин къене хъун теклифзава.

Гьа са вахтунда духтурди къейд авурвал, адетдин чIулав ко­федихъ кьве сятдани са затIни жедач, гьакI ятIани, ада кофе холодильникда эцигун хъсан яз гьисабзава.

Идалай вилик Австралиядин университетдин алимри йикъан къене ругуд истикан ва адалайни гзаф кофе хъун зарарлу тирди тестикьарнай. Абурун фикирдалди, гьар юкъуз кьадарсуз кофе ишлемишуни рикIинни дамаррин азарар акатунин хаталувал артухарун мумкин я.

Фергюсон секинариз кIанзава

Какахьай женгерай Россиядин машгьур спортсмен, дагъустан­ви Ислам Махачеваз америкави Тони Фергюсонахъ галаз бягьс кьиле тухудай ашкъи ава. Идакай “MMA Junkie” чешмеди хабар гузва.

“Заз адаз спортдай эхкъечIун патал куьмек гуз кIанзава”, — ла­гьана Махачева. Дагъустанви спортсменди UFC-да галаз-га­лаз­ 8 гъалибвал къазанмишнава. Кьезил заланвилин дережада авай UFC-дин спортсменрин арада алай вахтунда ам 14-чкадал ала.

Коронавирус

Эхиримжи делилралди, дуьньяда коронавирус акатайбурун кьадар 117 миллиондилай алатнава. Сагъ хъхьанвайбурун кьадар саки 94 миллиондиз мукьва жезва. Коронавирусдик кьейибурун кьадар 2,6 миллиондилай алатнава.

Исятда авай делилралди, дуьньяда виридалайни гзаф США-дин агьалийрик коронавирус акатнава. Кьвед лагьай чкадал Индия ала, пуд лагьай чкадал — Бразилия, кьуд лагьай чкадал — Россия, вад лагьай чкадал — Великобритания.

Алай вахтунда дуьньядин хейлин уьлквейра коронавирусдиз акси рапар ягъун давам жезва.

«Лезги газет»