И мукьвара, 15-февралдиз, лезги халкьдин баркаллу векил, алим, биологиядин илимрин доктор, профессор, РАЕН-дин ва Нью-Йоркдин илимрин академиядин академик, РФ-дин ва Дагъустан Республикадин илимрин лайихлу деятель лагьай тIварарин, гьакIни “Дуствилин орден” (2002-йис) ва “Гьуьрметдин орден” (2006-йис) наградайрин сагьиб Эмирбег Зиядович Эмирбегова хайи югъ къейдна.
Ростовдин государстводин университетдин (ЮФУ) Дагъустанда авай филиалдин илимдин руководитель тир камаллу алимдиз и лишанлу югъ вичин багърийрихъ, мукьва-кьилийрихъ, ярар-дустарихъ галаз санал гзаф кьадар амадагри, алимрини тебрикна ва чими келимайралди рикIин сидкьидай алхишарна. Абурукай сада — высший образованидин федеральный государстводин автономный илимдин идара тир “Кьиблепатан федеральный университетдин” патай агакьнавай тебрикдин чарче къейднавай делилри алимди неинки республикадин, гьакIни вири уьлкведин илимдин сергьятар хейлин гегьеншарнавайди къалурнава. И кардал иллаки дамах авуналди, чна а чар агъадихъ чапзава. Редакциядин патайни гьуьрметлу алимдиз тебрикдин келимаяр рекье твазва.
“Гьуьрметлу Эмирбег Зиядович! Кьиблепатан федеральный университетдин, Россиядин Кьиблепатан академический жемиятдин тIварцIелай ва гьакIни кьилди жуван патай Квез хайи югъ мубаракиз кIанзава! Куь пешекар уьмуьр гзаф терефрихъай Кьиблепатан федеральный университетдихъ галаз алакъалу я — ина Квекай илимдинни образованидин вини дережадин пешекар, нетижалу менеджер, тешкилатчи хьана. Махачкъалада ЮФУ-дин филиалдин кIвалах къвердавай хъсанарун ва виликди тухун Куьне гзаф йисара университетда чIугур зегьметдихъ галаз алакъалу ийизва. Виликдай хьиз, Куьне исятдани адакай республика патал илимдинни чирвилер гунин ва яшайишдинни культурадин важиблу центр хьуник еке пай кутазва.
Ахтармишунардайдан жуьрэтлувили ва бажарагъди, къастунал кIевивили ва пешедин рекьяй кIватIнавай тежрибади Квез гьеле лап жегьил вахтунда амаз илимрин доктор жедай, ахпа лагьайтIа, пешекар жемиятда кьунвай чка мягькемардай, илимдихъ галаз къакъудиз тежер жуьреда алакъалу тIварцIиз элкъведай мумкинвал гана.
Куь дибдин кьилин ахтармишунри ва разработкайри биологиядин хилен чирвилерин сергьятар гегьеншарнава, Куь ахтармишунрин асул нетижаяр еке майданра ишлемишзава. Абур 450 публикацияда, кьилди къачуртIа, 12 монографияда, илимдин 8 пособида, цIийи шейэр ачухарзавай 4 ахтармишуна къейднава.
Куь илимдин кIвалахри ва тешкилатчивилин бажарагъди, гьакIни республикадин гьукуматдин патай куьмекди Махачкъалада университетдин 20 йисан вахтунда Куьне регьбервал авур филиал ачухдай мумкинвал гана.
Чаз Квехъ инлай кьулухъни къуватар, къастунал кIевивал, мягькем сагъламвал, хушбахтвал, еке агалкьунар, са фикирдал алай ксарин рейсадвал, багърийрин патай кIанивал хьана кIанзава!
Гьуьрметдалди, ректор И.Шевченко ва президент М.Боровская”.
«Лезги газет»
