Советрин гьукуматди дуст уьлквейриз гьамиша экономикадин, техникадин, военный ва маса рекьерайни куьмекар гузвай. Ихьтин куьмек Афгъанистандивни агакьнай. И уьлкведи вичиз армиядалди, воентехникадалди куьмекун тIалабнай. Аниз са куьруь вахтунда гьазурвилер акур агъзурралди чи аскерар рекье тунай.
ИкI, интернациональный буржи тамамарзавайбурун жергеда Курхуьрелайни цIуд касдилай гзаф жегьилар авай. Шайдаев Айдинни (шикилда) абурукай сад тир. Ада 1978-йисуз юкьван мектеб куьтягьна. 1980-йисуз Дербентдин 4-нумрадин ПТУ-да чирвилер къачуна. Армиядиз тухвай ам Ашхабаддиз акъатна. Ина са куьруь вахтунда военный техника чирна, са дестедихъ галаз Афгъанистандиз тухвана. Ада хуьрера, дагълара кьиле фейи женгера, разведкадин серенжемра иштиракна. Баркалла алаз вичин интернациональный буржи кьилиз акъудна. Чешнелу къуллугъдай адаз командирди са шумудра чухсагъул малумарнай. 1982-йисан 27-апрелдиз Айдин кIвализ хтана. Адан хурудал медалри, знакри нур гузвай. Айдин Шайдаеваз 1988-йисуз СССР-дин Верховный Советдин Президиумдин Гьуьрметдин грамота ва махсус медални гана. Ада Каспийскда “Дагдизель” заводда кIвалахзава.
Райсудин Набиев
