Сулейман-Стальский райондин хуьруьн майишатдин ва суьрсетдин управленидин начальникдин заместителар тир Гьамидин Абдулкъафаровахъ ва Къазагьмед Абумислимовахъ галаз чи ихтилат райондин хуьруьн майишатдин кар алай хилер тир уьзуьмчивални багъманчивал вилик финикай ва и кардик пай кутазвай карханайрикайни арендаторрикай фена.
Абуру чаз лагьайвал, районда багълари 3656 гектардин майданар кьунва. Абурукай 2498 гектар бегьердал атанвай, 1159 гектар — жегьил багълар я. Алатай йисуз районда, план 80 гектар яз, 212 гектарда цIийи багълар кутуна. ЦIи 449 гектарда багълар кутун планламишнава. И кардиз гьазурвилерни аквазва.
Райондин агропромышленный комплексда уьзуьмчивални кар алай хел я, амни виликди физва. И кардин патахъай 2020-йисуз районда 14396 тонн ципицIар кIватI хъувуни (юкьван гьисабдалди — гьар са гектардай 106 центнер) ачухдиз шагьидвалзава.
Гьамидин Абдулкъафаров ва Къазагьмед Абумислимовни галаз чун арендадин са шумуд участокдиз фена.
Агъа СтIал-Къазмайрилай тир Абдурагьман Бабаева (сад лагьай шикилда) Дагъустандин хуьруьн майишатдин институт ва Волгограддин педуниверситетдин химиядинни биологиядин факультет акьалтIарна. Ада яргъал йисара хайи хуьруьн юкьван школадин директорвиле кIвалахна, алай вахтунда муаллим-социолог я.
РФ-дин умуми образованидин гьуьрметлу работник, Президентдин грантдин сагьиб тир А.Бабаев районда ва адалай къецени гзафбуруз тежрибалу агроном язни чида. Адахъ 2006-йисуз кутунвай ичин, шефтелрин ва чуьхверрин 2 гектар багъни ава. Чешнелудаказ гелкъуьн тешкилнавай багъларай ада гьар йисуз емишрин тарифдин бегьерар кIватI хъийизва. 2015-йисуз ада тарарин кьурай герек авачир хилер атIунай районда тухвай конкурсда (28 багъманчидин арада) ва республикадин конкурсда (32 касдин арада) 1-чкаяр кьуна. И агалкьунрай А.Бабаеваз РД-дин хуьруьн майишатдин ва суьрсетдин министерстводи 1-дережадин диплом ва телевизор гана.
Лагьана кIанда, А. Бабаева багъларихъ гелкъуьнин рекьяй вичин тежриба (мастер-классар кьиле тухуналди) Мегьарамдхуьруьн, Къайтагъ, Дербент районра чирна. Багъманчивилин сирер ачухариз ам Кьасумхуьруьн телевиденидай мукьвал-мукьвал рахазва.
Эминхуьряй тир Алимирзе Агъамирзоевни (кьвед лагьай шикилда) тежрибалу агроном-уьзуьмчи я. Ада саки 25 йисуз “Аламишинский” совхозда уьзуьмчивилин бригададин бригадирвиле, кьилин агрономвиле ва 6 йисуз “Зардиян” ООО-да старший ва кьилин агрономвиле гьакъисагъвилелди зегьмет чIугуна. 2018-йисуз А.Агъамирзоеваз “РД-дин хуьруьн майишатдин лайихлу работник” лагьай тIвар гана.
Эхиримжи йисара Алимирзе Агъамирзоева Эминхуьре арендатор яз кIвалахзава. Адахъ 49 йисан муддатда арендада къачунвай 8 гектарда кутунвай уьзуьмлухар ава. Чаз акурвал, уьзуьмлухар хъсан гьалда ава. Анра жергейрин араяр цанва, тегьенгрин пунариз пер янава, ятар ганва. Чун фейила, арендатор тегьенгрин кьурай ва герек авачир хилер атIунал машгъул тир. 7 гектарда и серенжем кьиле тухванвай.
А. Агъамирзоева чаз лагьайвал, ада гьар йисуз уьзуьмлухрин гьар са гектардай 95-110 центнер ципицIар кIватI хъийизва. Кьасумхуьруьн телевиденида кардик квай “Пешекар агрономдин меслятар” передачадани ада мукьвал-мукьвал иштиракзава, меслятар гузва.
— Са рахунни алачиз, Абдурагьман Бабаев ва Алимирзе Агъамирзоев хьтин пешекарриз халкьдин суфра берекатлу ийизвайбур лугьуз жеда, — алава хъувуна Гьамидин Абдулкъафарова. — Гьахьтинбур районда гзаф ава. Аферин ва баркалла чилин къадир авай, зегьмет чIугвазвай инсанриз!
Хазран Кьасумов
