Алим, Дагъустандин биологиядин илимрин сад лагьай доктор, профессор, ДАССР-дин илимрин лайихлу деятель, Россиядин высший школадин лайихлу работник Агъалар Абутрабович Аливердиев рагьметдиз фена. Ада 1955-йисалай Дагъустандин государстводин университетда кIвалахна.
Профессор Агъалар Аливердиев инсандин ва гьайванрин физиология ахтармишунин кардив анжах вичиз хас тир жуьреда эгечIай алим-биолог тир. Ада ДГУ-дин биологиядин факультет тешкилун ва Дагъустандин биологиядин илим арадал атун, вилик фин патал еке зегьметар чIугуна. Алим СССР-дин АН-дин президиумди, СССР-дин АН-дин илимдин советди комплексный месэлайрай тестикьарнавай “Механизмы адаптации живых организмов к электромагнитным излучениям” тIвар алай илимдинни ахтармишунрин кIвалахдин руководитель тир. Агъалар Абутрабович неинки ахтармишунрал машгъул хьана, гьакIни ада къачур илимдин делилар республикадин къушчивиле ва малдарвиле уьмуьрдиз кечирмишна.
Ада теклифай гьайванриз ва къушариз ультрафиолетовый нурар гунин вини дережадин технология Буйнакский, Хасавюрт ва Къизилюрт районрин колхозра ва совхозра агалкьунралди са шумуд йисуз ишлемишна. ДАССР-дин хуьруьн майишатдин министерстводин делилралди, гьайванрин ва къушарин менфятлувал хкажун патал ультрафиолетовый нурари аквадай хьтин нетижаяр гана. Гьа и кIвалахдай адаз Дагъустан Республикадин Государстводин премия гана. Профессор А.Аливердиев биотехнологиядай международный “Холод” академиядин член-корреспондент, Нью-Йоркдин академиядин академик тир.
Агъалар Аливердиев илимдин 150-далай гзаф кIвалахрин автор тир. Абурун арада къад монография, гзаф кьадар макъалаяр, гьакIни вузрин биологиядин ва психологиядин факультетрин студентар патал герек пособийрин автор тир. Адан “Инсандин ва гьайванрин физиология” учебный пособие Дагъустандин вузрин биологиядин ва психологиядин факультетра кIелзавай студентри ишлемишзава.
“Лезги газетдин” редакциядин коллективди Агъалар Аливердиеван мукьва-кьилийриз, дериндай хажалат чIугунивди, башсагълугъвал гузва.
