Са шумуд югъ идалай вилик Мегьарамдхуьруьн районда 2007-2008-йисара ханвай жаванрин арада дзюдодай райондин кIвенкIвечивал къазанмишун патал акъажунар кьиле фена. ИкI, райондин саки вири хуьрерай атанвай 80-далай виниз жаванри заланвилин 9 категориядай чпин устадвал къалурна. Идакай райондин сайтда хабар ганва.
Макьсад районда дзюдо машгьур авун, гьакIни акьалтзавай несил ватанпересвилин руьгьдаллаз тербияламишун ва республикадин дережадин акъажунра иштиракдай викIегь спортсменар хкягъун тир спортдин и серенжем дзюдодин жигьетдай кардик квай международный къайдайрал амална кьиле тухвана. Идалайни гъейри, республикада ва санлай дуьньядани коронавирусдин тIугъвалдихъ галаз ала-къалу гьалар фикирда кьуналди, акъажунар кьиле фидайла Роспотребнадзордин вири тIалабунрал амална.
Къизгъин бягьсерин нетижада жаванри дзюдодал чпин рикI алайди субут авунихъ галаз сад хьиз, чпихъ спортдин и жуьредай устадвал авайдини къалурна. Судьяйри къейд авурвал, жаванри техникадин рекьяй хъсан гьазурлухвал ва гъалибвал къазанмишун патал чпихъ еке къаст — руьгьдинни бедендин лигимвал авайди субутна. КIвенкIвечи чкаяр кьур дзюдоистриз талукь тир дережайрин дипломар ва медалар гана. Гъалиб хьайибурукай республикадин кIвенкIвечивилин акъажунра иштиракдай команда патал спортсменар хкяна.
«Лезги газет»
