Алай вацран сифте кьилерай Каспийскда, Къурамегьамед Къурамегьамедован тIварунихъ галай спортдин комплексда 2000-2007-йисара дидедиз хьанвай гадайрин ва рушарин арада армрестлингдай республикадин кIвенкIвечивал къазанмишун патал Дагъустандин сад лагьай чемпион, РФ-дин спортдин мастер Шагьбан Омарован призар къачунин акъажунар кьиле фена. Ана республикадин жуьреба-жуьре районрай ва шегьеррай тир 150-далай виниз гъвечIи спортсменри чпин гъилерин къуватлувал къалурна.
Акъажунра иштиракун патал Сулейман-Стальский райондин спортдин, туризмдин ва жегьилрин крарин рекьяй Комитетди Каспийскдиз армрестлингдай дуьньядин ва Европадин чемпионвилин тIварарин сагьиб, Россиядин Федерациядин лайихлу тренер Малик Тагьирбегован регьбервилик кваз 22 спортсмендикай ибарат тир команда рекье тунвай. Жаванри хъсан нетижаяр къазанмишна райондин команда 1-чкадиз лайихлу хьана.
Сулейман-Стальский райондин спортдин, туризмдин ва жегьилрин крарин рекьяй Комитетдин директор Надыр Эфендиева мадни алава хъувурвал, республикадин кIвенкIвечивал патал акъажунра 1-чкаяр кьур рушарини гадайри алай йисан мартдиз Орел шегьерда спортдин и жуьредай кьиле фидай Россиядин кIвенкIвечивал патал акъужунриз гьазурвал аквада.
Къуй гъвечIи пагьливанар анайни чаз шад хабарар гваз хтурай!
«Лезги газет»
