Квез чидани?

Тажарин (зонтичные) килфетдик акатзавай ярета набатат Кьиблепатан Америкада, Анды дагъларин турпагъра, гьуьлуьн дережадилай 3200-4500 кьакьанда авай чкайра экъечIзава. Вичин кIалубдиз килигна адал «набатат-хъуьцуьган» тIвар акьалтнава. Йисан къене и набататрин кьакьанвал вини кьил 2 сантиметр кьван хкаж жезва. Алай вахтунда ярета кьуд уьлкведа (Перу, Боливия, Аргентина, Чили) гуьзчивилик кутунва, хуьзва.

Яретадин кIалубдиз фикир гайитIа, гьакъикъатдани ам къацу рангунин чIехи хъуьцуьган хьиз аквазва. Битав са набататдиз ухшар ятIани, ярета сад-садав сихдаказ агатнавай гзаф кьадарда пешерикай ибарат я. Алимри тайинарнавайвал, бязи яретайрин яшар пуд виш агъзурдав агакьзава. Къейдзавайвал, ярета къадим, ажайиб ва набататрин алемда са куьнизни ухшар авачирди я. Пешерин сихвили а набатат аяздикайни, зарарлу гьашаратрикайни хуьзва.

Чкадин агьалийри набататдин танарикай къиметлу шкьакь хкудунин карда менфят къачузвай. И кар себеб яз яретаяр михьиз терг хьунал къвезвай. Ихьтин гьалар себеб яз алай вахтунда яретаяр атIун къанундалди къадагъа авунва.

«Лезги газет»