Алай йисан 9-мартдилай РД-дин экономикадин ва мулкар виликди тухунин министерстводи государстводин “Дагъустан Республикадин дагълух мулкар яшайишдинни экономикадин жигьетдай виликди тухун” программада иштиракиз кIанзавайбурун арзаяр кьабулиз башламишда.
РД-дин экономикадин ва мулкар виликди тухунин министерстводин пресс-къуллугъди хабар гузвайвал, программа РД-дин Гьукуматди 2020-йисан 18-февралдиз кьабулай къарардалди тестикьарнава. Адан макьсад дагълух чкайра яшайишдин ва экономикадин рекьерай арадал атанвай шартIар хъсан патахъ дегишарун, агьалийрин уьмуьрдин ерилувал ва дуланажагъ виниз хкажун, и чкайра экономикадин жигьетдай дурумлудаказ виликди фин таъминарун я.
“Агъадихъ галай рекьерай субсидияр чара авун пландик ква: РД-дин дагълух чкайра авай хсуси куьмекдин майишатри хуьруьн майишатдин гъвечIи жуьредин техника маса къачун; РД-дин дагълух чкайра суьрсет хуьз жедай логистикадин центраяр эцигун; РД-дин дагълух чкайра недай ва хъвадай суьрсет гьасилдай производство патал лазим тадаракар маса къачун; РД-дин дагълух чкайра промышленностдин суьрсет гьасилдай карханаяр арадал гъун ва я абур алай аямдихъ галаз кьадайвал тадаракламишун; РД-дин дагълух чкайра тIимил чка кьадай теплицаяр эцигун”, — къейдна министерстводин векилди.
Адан гафаралди, субсидиядин куьмек республикадин дагълух чкайра регистрация авунвай ва анра чпин майишатчивилин кIвалах кьиле тухузвай карханайриз, кьилдин карчийриз ва ЛПХ-риз гуда. Конкурсда иштиракунин чарасуз шартI инвестицийрин проект гьуьлуьн дережадилай 500 метрдилай агъуз тушир дережада хьун я. Ихьтинбурук республикадин 30 муниципалитетда авай агъзурдалай гзаф хуьрер акатзава.
Субсидияр къачун патал арзаяр 2021-йисан 11-майдалди Дагъустандин МФЦ-дин отделенийра, государстводин ва муниципальный къуллугърин Сад тир порталдин куьмекдалди, гьакIни РД-дин экономикадин ва мулкар виликди тухунин министерстводин дараматда кьабулда.
«Лезги газет»
