Мегьарамдхуьруьн райондин мектебда кIелзавай рушан “Къадим девирдин платан — тарихдин шагьид, мискIи хуьзвайди” шикилди “Йисан Европадин тар — 2020” конкурсдин республикадин дережада пишкешдин чка кьуна.
Аялрин шикилрин конкурс мектебра кIелзавай ва яшдиз килигна пуд дестедиз пайнавай жаванрин арада кьиле тухвана: 6-9 йис, 10-13 йис ва 14-17 йис. Санлай къачурла, конкурсдин комиссиядив 400-далай гзаф кIвалахар агакьарнавай. Абурукай 12 шикил гъалиб хьана.
Вини дережада къимет гайибурун арада Мегьарамдхуьруьн райондин Билбилхуьруьн М.Абдуллаеван тIварунихъ галай юкьван образованидин мектебдин ученица Хадижа Набиевадин шикилни ава. Къейд ийин, руша аялрин шикилрин муниципальный ва республикадин конкурсра идалай вилик йисарани гъалибвал ва пишкешдин чкаяр къазанмишайди я.
Конкурсдин районда кьиле фейи паюна гъалиб хьайи Хадижади республикадин дережадин конкурсда Мегьарамдхуьруьн райондин патай векилвална ва ина ада 3-чка кьуна. Ученицадин руководитель, Билбилхуьруьн юкьван мектебдин изобразительный искусстводин тарсарин муаллим Заминат Мирзалиевна Саидовади къейдзавайвал, рушахъ и рекье кьетIен бажарагъ ава, адан и кардал иллаки рикIни ала.
31-январдиз Дербент шегьердин ДДЮТ-да аялрин шикилрин “Йисан Европадин тар — 2020” конкурсдин гъалибчийрин пишкешар ва дипломар гунин мярекат кьиле фена.
«Лезги газет»
