Махачкъалада, “Дуствилин кIвале” Дагъустандин муфтий, Агьмад гьажи Абдуллаеван тажик чIалал чапнавай “Благонравие праведников” ктабдихъ галаз танишарунин мярекат кьиле фена. Ам Дагъустан Республикадин милли сиясатдин ва диндин крарин рекьяй министрдин везифаяр вахтуналди тамамарзавай Энрик Муслимова кьиле тухвана.
— Къе чун таниш жезвай Агьмад гьажидин ктаб чина урус ва араб чIаларал акъатнай, лагьана ада. Ам узбек, киргиз, къазах чIаларизни таржума авунва. Ингье гила инсандин, мусурмандин, динэгьлидин лап хъсан къилихриз бахшнавай, гьар са кас и дуьньядал хъсан крар авуниз мажбур тирдакай, къвалав гвайдаз, кIеве авайдаз рикIин жумартвилелди куьмек гун ферз тирдакай кхьенвай маналу ктаб тажикривайни чпин чIалал кIелиз жеда. Лугьун лазим я хьи, ктаб “Дагъустан Республикада терроризмдин идеологиядиз аксивалдай комплексный программа” госпрограмма уьмуьрдиз кечирмишунин сергьятра аваз акъуднава. Ам акьалтзавай несилдиз ахлакьдин, диндин, марифатдин, инсанвилин тербия гунин карда лап хъсан чешме я.
Ктабдин таржумачи Саидбег Магьмадуллаева къейд авурвал, сифте ктаб урус чIалай таржума ийиз эгечIна. Урус чIалай тажик чIалаз элкъуьриз четин жезвай. Эхирни ктаб араб чIалай таржума ийидай фикирдал атана. “Чна гьалтзавай четин гафариз баянарни ганва. Тажикри и ктаб фадлай гуьзетзавай, гила абурувни ам агакьда”, — ла-гьана ада.
Мярекатдал пара ширин сесералди Алишер Салиева Къуръандин бязи аятар кIелна, Гьасана ва Тажидона нашидар лагьана. КIватI хьанвайбур Агьмад гьажидикай гьазурнавай фильмдизни килигна.
Дагъустандин Муфтиятдин председатель Шамил Алиханова, Дагъустандин писателрин Союздин председатель Мегьамед Агьмедова ва масабуру ктабдин метлебдикай лагьана, чи республикада кIелзавай тажик миллетдин студентри шиирар кIелна.
Мярекатдин эхирдай иштиракчийриз цIийи ктабар багъишна.
Хийир Эмиров
