И мукьвара Белоруссиядин меркез Минскда грекринни римлуйрин жуьреда кьуршахар кьунай кьиле фейи уьлкведин чемпионатда лезги кьегьал хва, вичин ери-бине Хасавюрт райондин Къурушдилай тир, спортдин и жуьредай са шумудра чIехи гъалибвилер къазанмишнавай Радик Къулиевани иштиракна. 82 кг-дал къведалди заланвал авайбурун арада финалдин акъажунра чкадин викIегь спортсмен, уьлкведин акъажунрин алатай йисан чемпион Станислав Шафаренкодихъ галаз кьиле фейи бягьсина Радик Къулиева чемпионвилин тIвар къазанмишна.
РикIел хкин: чи ватандаш 2009-йисалай Белоруссияда яшамиш жезва. 2015-йисалай инихъ ада уьлкведин хкянавай командадик кваз международный турнирра иштиракзава. 2020-йисузни (а чIавуз чи кьве ватандашди иштиракнай, Жавид Гьамзатова гимишдин медаль къазанмишнай) финалдин акъажунра Николай Стародубахъ галаз кьиле фейи бягьсина Радика (87 кг) Белоруссиядин чемпионвилин тIвар къазанмишнай. Спортдин рекье бегьерлу камар чи ватандашди 2017-йисузни къачунай. ИкI, Франциядин меркезда кьуршахар кьунин пуд жуьредай (грекринни римлуйрин жуьреда, азаддаказ ва дишегьлийри кьуршахар кьунай) кьиле фейи дуьньядин чемпионатда Радик Къулиева гимишдин медаль къазанмишнай. Гьа и йисуз ада Европадин чемпионатдани 2-чка кьунай.
Чна Радик Къулиеваз нубатдин агалкьунар рикIин сидкьидай мубаракзава. Адахъ ва спортдал рикIивай машгъул тир амай кьегьалрихъни дуьньядин спортдин майданра мадни еке агалкьунар хьун чи мурад я.
Чи мухбир
