Квез чидани?
Шикилдай аквазвай ажайиб гьайвандиз лув гудай сикI лугьузва. Абур лувар квай гьайванрин (крыланы) килфетдик, гъилер лувар тир жинсиник акатзава. Алай вахтунда ихьтин гьайванрин 60 жуьре ама.
Абур Азияда, ЦIийи Гвинеяда, Океанияда, Австралияда ва Мадагаскарда яшамиш жезва. Абурун ахъайнавай луварин яргъивал 1,5 метрдив агакьзава. Гьайвандин тIиш кIвенкI алай жуьрединди я, япар — гъвечIибур. Лув гудай сикIрен кьил кицIиндаз ва адетдин сикIрендаз ухшар я. Лап чIехи гьайванрин яргъивал 40 сантиметрдив кьван агакьзава.
Лув гудай сикIери емдин еринда набататрин миже ва емишар ишлемишзава. Кьилди къачуртIа, манго, банан, авокадо абуру рикI алаз незва. Эвкалиптдинни инжилдин мижеярни гзаф ишлемишзава. Емишар тIимил авай чкайра лув гудай сикIери набататрин чкалар ва гьашаратар незва. Са йифиз абурувай 60 километрдин мензилдиз кьван лув гуз жезва. И гьайван хъсандиз вилериз акунин ва ни атунин жигьетдай тафаватлу жезва.
«Лезги газет»
