2- февралдиз Дербент райондин Белиж поселокдин М.Ярагъидин тIварунихъ галай 1-нумрадин юкьван мектебда дидед чIа­лан Международный йикъан сер­гьятра аваз Дагъустандин ав­торрин эсерар хъсандиз кIелу­най РД-дин образованидин ва илимдин министерстводи школь­никрин арада тухузвай конкурсдин лезги чIалан номинациядай  райондин дережадин пай  кьиле фена. Ана 11-класс­ра кIелзавай аялри иштиракна.

Мярекатдиз РД-дин Халкьдин Собранидин депутат, Дербент райондин образованидин управленидин начальникдин везифаяр вахтуналди тамамарзавай   Эрик Ибрагьимов, РУО-дин методикадин центрадин руководитель Тамила Алие­ва, Белиж поселокдин ад­министрация­дин кьилин заместитель Абдулгьамид Ражабов, ша­ир, ди­­­дед чIа­лан муаллим Гъулангерек Иб­рагьимова, М.Ярагъи­дин тIва­рунихъ галай школадин директор Имара Залова, аялар, му­ал­ли­мар, и цIарарин автор атанвай.

Конкурсдин иштиракчияр тебрик авуналди, Эрик Ибрагьимова  серенжемдин важиблувал къейдна ва иштиракчийрихъ агалкьунар, гъалибвилер хьун алхишна.

“Хайи чIалан югъ чи мектебда тешкиллудаказ кьиле тухун хъсан адетдиз элкъвенва. Конкурсда иштиракзавай аялри чун халкьдин медениятдал кьару ийизва, чав чими гьиссер агакьарзава, чи Дагъустан Урусатда виридалайни гзаф миллетар санал дуствилелди яшамиш жезвай макан тирди мад сеферда тестикьарзава” — лагьана вичин рахунра И. Заловади.

Гуьгъуьнлай милли парталар алаз сегьнедиз экъечIай аялри СтIал Сулейманан, Хуьруьг Тагьиран, Гъулангерек Ибрагьимовадин, Мердали Жалилован, Седакъет Керимовадин ва маса авторрин эсерар фасагьатдиз, таъсирдайвал кIелна.

Жюридин къарардалди, 1-чкадиз Карина Рамазанова (Белиждин 4-нумрадин СОШ), 2-чка­­диз Тамум Абдуллаева (Белиждин 2-нумрадин СОШ) ва  Ру­мина Мегьамедова (Хазардин СОШ), 3-чкадиз Самира Жамалдинова (Белиждин гимназия) ва Тамила Шай­да­бегова (Белиждин 1-нумрадин СОШ) лайихлу хьана­.

Гъалибчидив ва кIвенкIвечи чкаяр кьурбурув Э.Ибрагьимова  Дербент райондин админи­стра­циядин образованидин уп­рав­ле­нидин патай грамотаяр вах­кана.

Карина Рамазановади Дербент райондин патай конкурсдин республикадин дережадин паюна иштиракда.

Мярекат манидар Жульетта Омаровади, РД-дин искусствойрин лайихлу деятель Мамедали­ Агъабалаева, кьуьлердай “Кавказ” ва “Садвал” ансамблри, Белиждин ДДЮТ-дин ва мектебдин жаван артистри генани чIагурна.

Къагьриман  Ибрагьимов