Январдин вацран эхиримжи кьве юкъуз Челябинскдин ЦОП-да дзюдодай областдин губернатордин Кубок патал Вирироссиядин акъажунар (итимрин ва дишегьлийрин) кьиле фена. Юбилейдинбур, 20-сеферда кьиле тухвайбур тир и акъажунра (гъалиб хьайи спортсменриз спортдин мастервилин тIвар гузва) цIи Россиядин 24 региондай 284 спортсменди чпин устадвал къалурна. Абур ачухуниз талукьарнавай шад мярекатда багьа мугьманрин арада аваз дзюдодай Европадин союздин регьбер С.Соловейчика, Челябинскдин областдин дзюдодин федерациядин президент, губернатордин сад лагьай заместитель В.Мамина, къаюмвалдай советдин председатель И.Текслера ва масабуру иштиракна.
Шадвилелди а кардикай хабар гуз кIанзава хьи, кьве юкъуз гьасиррал къизгъиндаказ кьиле фейи акъажунрин нетижада Кубокар къазанмишайбурук чи кьве ватандашни ква. Абурукай сад спортдин рекье мягькем камар къачунвай чи ватанэгьли, Челябинскдин областдин патай экъечIнавай Ренат Саидов (100 кг-дилай гзаф) ва муькуьдини — Тюмендин областдин патай экъечIнавай Шамил Зилфикъаров (73 кг-дал къведалди) я.
ИкI, Россиядин международный классдин спортдин мастер, дуьньядин ва Европадин чемпионатрин буьруьнждин медалрин сагьиб, Олимпиададин къугъунрин иштиракчи Ренат Саидоваз (“бросок” ишлемишуналди, яни гуьрчегдаказ къуьнелай кьуна гадаруналди), вичихъ галаз бягьсиниз экъечIнавай Муса Туменован далу кIаник авун патал анжах 2 декьикьа лазим атана.
— Квез акуна хьи, Ренат Саидова акъажунрин эхирдай гьихьтин гуьрчег “точка” эцигнатIа. Губернатордин Кубокни Кьиблепатан Уралда амукьда. Челябинскдин дзюдоистрикай виридалайни Ренат Саидован бягьс рикIел аламукьна. Ада лап гуьрчегдаказ ва инанмишвилелди гъалибвал къазанмишна, — къейдна шабагьар вахкуниз талукьарнавай шад мярекатдал Ирина Текслера ва Виктор Мамина.
Чи муькуь ватандашдини вичин устадвал вини дережада аваз къалурна. ИкI, 73 кг-дал къведалди заланвал авайбурун арада къизгъиндаказ кьиле фейи бягьсина Ш.Зилфикъароваз Иван Черных кумукьна.
Чна кьве ватандашдизни къазанмишнавай нубатдин агалкьунар рикIин сидкьидай тебрикзава, абур мадни кьакьан кукIушриз хкаж хьун алхишзава.
Чи мухбир
