Мукьвара Кьасумхуьрел, издательстводин “ЦIийи Кавказ” — “Куьредин ярар” дестеди лезгийрин машгьур гьикаятчи, Сулейман-Стальский райондин Шихидхуьруьн мектебдин муаллим Нажмудин Шихнабиеван “Большевик” тIвар алай ктаб чапдай акъуднава. Лагьана кIанда, ктаб авторди ДАССР-дин 100 йис тамам хьунин сергьятра аваз гьазурнава.
“Большевик” гьикаятчидин ругуд лагьай ктаб я. Асул гьисабдай, ам чи тарихдикай кхьенвай повесть я. Ктабда уьлкведа Советрин гьукум тестикь хьайи девирдиз сиягьат авунва. Большевик, ялавлу инкъилабчи, Шихидхуьряй тир Абдулбари Къазанбегован образдин куьмекдалди алатай девир жуьреба-жуьре рангаривни таварив ацIай, рикIел аламукьдай, таъсирдай шикилралди ачухарнава.
Мукьвара Кьасумхуьруьн телевиденидин студияда Н.Шихнабиеван “Большевик” ктаб веревирд авуниз талукьарнавай мярекат кьиле фена. Ана ктабдин авторди, медениятдин “Куьредин ярар” центрадин регьбер Агьмедпаша Агьмедпашаева, шаир Абидин Камилова ва телевиденидин къуллугъчи Мизамудин Магьмудова иштиракна. Абуру ктабдикай чпин фикирар лагьана, адан важиблувал къейдна.
Агьмед Магьмудов
