Фидач рикIелай
Зи лезги чIал, хайи Ватан,
Алатдай туш мецелай.
ГъвечIизамаз хурухда кьур,
Диде фидан рикIелай.
Са бязибур маса чIалал
Рахазва гьа, чин тийиз.
Акъахнавай перем вичин
Бегьемвилел цун тийиз.
Са бязибур маларивни
Маса чIалал рахазва.
Им фитне туш ийизвайди,
Квезни а кар аквазва.
Са бязибур рахазвалда
Маса чIалал, чин тийир.
Нин тахсир я, зи лезги чIал
Вичин рикIе хуьн тийир.
ИкI жедани, азиз дустар,
Жуван хайи чIал течиз.
Урусдалди лугьуз гафар,
КIвализ хкир мал течиз.
Гьам Эмина, Сулеймана
Чи лезги чIал хвейид я.
Девлетлуяр гафаралди
Кавхани кваз кайид я.
Чи Сулейман Московдани,
Лезги чIалал раханай.
Теснифнавай шиирарни
Дидед чIалал лагьанай.
Зун лезги я, зи лезги чIал,
Ам гьамиша вине я!
Хайи Ватан! Дидедин чIал
Умуьрлух зи бине я!
«Лезги газетдин» 2021-йисан 4-нумрадай
________________________________________________________________________________
Нумрадиз шиир
Гатфариз
Тарари цуьквер ахъагъай чIавуз,
Пара гуьрчегдиз аквада багълар.
Хуш сесинивди манияр лугьуз,
Вуч шад хуррам я чи лезги рушар.
Кьакьан тарари пеш ахъагъайла,
Къацу чIурарал аватда серин.
Ширин манийрин ванер атайла,
Ашкъидин гьиссер жеда зи секин.
Гьар жуьре цуьквер акваз вилериз,
Алахьай йикъар — девран гуьлуьшан.
ЮкIвар-чипIер ягъиз фейи рекьериз,
РикIел хквезва уьмуьрар жаван.
Пагь, вуч гуьзелдиз аквада синер!
Ракъинин нурар аватай чIавуз.
Михьи гьавадив ацIурна жигер,
Алгъвандин гъверер акъатай чIавуз.
Шад я инсанар, алукьна гатфар,
Емишрин тарари авурла цуьквер.
Дагъларин кукIушрал аватна ярар,
Михьи гьавади ачухна рикIер.
Юзбеган гуьгьуьл жедачни ачух?
Атирдин цуьквер-ракъар акурла.
Цуьквериз ухшар алукIна партал,
Рахаз, хъуьрезвай рушар акурла.
«Лезги газетдин» 2021-йисан 13-нумрадай.
____________________________________________________
Афгъанистан
1
Шумуд жегьил ви чилерал амукьна?
Шумудахъ ви дерт — хажалат галукьна?
Шумуд кIвале ясдин партал алукIна?
Афгъанистан, ви чилелай тел хтайла.
Шумуд касдин вилерилай гъана сел?
Ни лугьуда пис хабарри гъидач шел?
Чи дидейрин рикIерани туна гел,
Афгъанистан, ви чилелай тел хтайла.
Шумуд хьана, лагь, ви чилел игитар?
Жегьил чанар тухуз, хкиз мейитар.
ГьикI дидейрин рикIер ийин секинар?
Афгъанистан, ви чилелай тел хтайла.
Лезги чилин лезги стха тир а кас?
Белижви тир, тIварни вичин я Абас…
Шез амукьна, ам кIанзавай жегьил свас,
Афгъанистан, ви чилелай тел хтайла.
2
Къазанмишна Игитвилин тIвар вуна,
Ватан патал чанни гьайиф татана.
Дидедизни чизмач гафар лугьудай,
Эхиратдин кIвалин патав атана.
Азиз бала, вун секиндиз ксанва,
Бес дидедиз ахвар амач йифериз.
Йифен ахвар, йикъан кьарай атIанва,
Ви тIвар кьуна, сесиналди эвериз.
Ваз эверай ванни къвезмач дидедин,
Ясдин партал алазма за алукIай.
Хуьз хьанач вун садавайни куьмекна,
Гуьллейрикай душмандивай галукьай.
Зун пенжердай килигзава куьчедиз,
Белки, зи хва, алатIа вун куьчедал!
Гагь, азизди, вил вегьезва бахчадиз,
Фикирзава къатканва жал векьедал.
Югъни-йифни какахьнава дидедин,
Фикирри зун тухузава яргъариз.
Гъиляй кIвалах къвезмач хьи зи, дидедин,
Юкъуз-йифиз Сад Аллагьдиз ялвариз…
«Лезги газетдин» 2021-йисан 36-нумрадай.
