1. Кьил ичIи хьайитIани, гъил ичIи тахьурай!
2. Кур чIехидав гъвечIи тIур жедач.
3. Гузвай тIекве пек твадай гъил кьурурай.
4. Гузвай гъил ачухайла, къачузвайди кIевдани?
5. Чуьнуьхай затI гьалал жезвайбурни авайди я.
6. ЧIехи тIунахъ галайбуруз вири иливда.
7. Гьисаб тавуна незвайбуруз вири гьалал я.
8. Виш кесиб дустунилай са куьгьне манат хъсан я.
9. Пул — вири я. Пул авачирди — са затIни.
10. Верчериз — тварар, чаз — къурар! Гьикьван хьайи­тIани, артух жедач.
11. ЧIехида чиниз вегьей балгъан къизилдин манатдай я. Усал затIни гуьрчегарда.
12. Кесиб кIвалелай девлетлудан захутIни хъсан я.
13. Эсилдиз лам ятIани, кIаник шивер хьтин машинар ква!
14. Акьулдиз ваъ, къанмазвилиз килигна, къимет гузва.
15. Шивер шедайла, ламар хъуьреда. Ламариз кьадар пар гьамиша амукьда.
16. Ламар амаз, шиверин тарифардай ахмакьар…
17. Ламран як такIан хьун адан къиметлувиляй я.
18. Къуллугъ гъиле амай кьван мал я.
19. Сурарик квай кьван вирибур инсанар туш. Ламарни кучукзавайди я.
20. Бедендиз гъвечIи ятIани, къуватдиз лам чIехи я.
21. Ламарихъ кьуд тафават ава: япар — яргъи, сарар — чIехи, акьул — дерин, мадни са затI…
22. Лам квай ихтилат виридалайни ширинди я.
23. Ламран рушахъ кьван илчияр садахъни жеч!..
24. Дяведиз — шивер вилик, кафедиз — ламар вилик!
25. Виридуьньядин ламар! Сад хьухь!
26. Ламран ардилай ширин сес махара хьун мумкин я.
27. Лам авачир кIвал виле аквадач.
28. Лам тербияламишиз пая бес я.
29. Ламралай хьайиди шиврелай хьайидахъ калтугда! Ламралай хьайиди шиврелай хьайидав гекъигда!
30. Шивре мердвал ламравай къакъудна.
31. Ламрахъ галаз кутIунай шив фад машгьур жеда.
32. Гуж — шивренди, кьуш — ламранди!
33. Аваран хуьр ламари чирда.
34. Къушар — кIуфарилай, ламар — цIапарилай…
35. Ламарикай гзаф рахун абурал пехилвиляй я.
36. Ламран вилера цавун гъетерин нурар кузва.
37. Ламран тербия кьур шивцелни абур къведа.
38. Темпелвал — кьегьалвилин замин я.
39. Ламран мердвал сад муркIадиз, садни руьхъведиз хъсан чида.
40. Ламра тухвиляй, жанавурди гишинвиляй чилиз кIур яда.
41. Гишин ламар жедач! Гишин шивер — виринра…
42. Гзаф чуьнуьхайди — кьегьал, тIимил чуьнуьхайди — угъри…
43. Гьуьрмет гьуьрметдин ваъ, ягьсузвилин емиш  я.
44. Ягьсузвал течирди гьамиша кьулухъ жеда.
45. Ягь ава — пул авач; пул ава — ягь авач!
46. Кар хиве яхъ, гъиле — садрани!..
47. Кар туькIуьдалди чан лагь. ТуькIуьнни — квахь!..
48. Тахтарин эвел — тапаррин гъиле, бахтарин эвел — ламарин гъиле!..
49. Ар ягъун — бахтлувилин кукIуш я.
50. Кьиле затI авачиз, гъиле затI хьун — са ламариз ачух илим я!
51. КIвалах — кьилив ая, хчал — гъилив!
52. Ламар амай кьван коррупция рекьидач!
53. Илимриз течирбур ламариз чида.
54. Ламравай тарс къачурди виринра вилик жеда!
55. Кьил хуьз ламра чирда, кIвачер хуьз — жанавурди.
56. Хъсан шивцелай пис лам хъсан я!
57. Хатур ийидатIа, ламраз ая. Вирида ваз ха­турда!
58. Ламран гьуьрмет — женнетдай я!
59. Лам авайдаз маса дуст герек жедач.
60. Лам ава — вири ава, лам авач — затIни…
61. Ламарив вердиш хьайидаз са гъамни амукьдач!
62. Мух — ламариз! Ух — балкIанриз!
63. Лам — жуванди, цIап — патанди…
64. Лам хвейиди вирида хуьда!
65. Ламраз чир хьайиди алемдиз чир жеда!
66. Ламраз гайи салам гьакимдиз гайидай я.
67. Лам — варарай, шив — кIарарай!
68. Ламралай аватайди фад женнетдиз аватда!
69. Ламариз — хам, шивериз — гъам!

Мерд  Алидин дафтардай