Лезги чIалал чапзавай эдебиятдин “Самур” журналдин 2020-йисан эхиримжи 6-нумра акъатнава. Ана жуьреба-жуьре жанрайрин итижлу эсерар гьатнава.
Дагъустандин халкьдин писатель Абдуселим Исмаилова вичин “Вахтунин имтигьанар” тIвар алай макъалада 2020-йисуз дуьньяда ва чи уьлкведа кьиле фейи сиясатдин вакъиайрикай веревирдер ийизва ва абуруз вичин къиметар гузва.
“Шиират” разделда Кьурагь райондин Гелхенрин хуьряй тир шаир Сейфудин Шагьпазован ва гьакIни Абдула Даганован, Гъазимбег Багьандован (80 йис) ва Сугури Увайсован (85 йис) юбилейрихъ галаз алакъалу яз абурун шиирар ганва. Авар, дарги ва лак чIаларай шиирар таржума авунвай А.Исмаилова къейдзавайвал, “Самур” ва Дагъустандин маса чIаларал акъатзавай журналрихъ фадлай мягькем хьанвай адетар ава. Абурукай садни “Стха халкьарин литература” рубрика хьун я.
“Гьикаят” разделда писатель Нариман Ибрагьимован “Кьисметдин къекъуьнрал” романдин эхир ганва. КIелзавайди эсердин кьилин игит Шагьвеледан уьмуьрда кьиле физвай цIийи ва ажайиб вакъиайрихъ галаз таниш жезва.
“Тамашият” разделда писатель Гьажи Ильясован “Хъуьруьн къведай агьвалат” къемеда давамарнава.
“Илим ва культура” паюна Етим Эминан ирс кIватI хъувунал ва шаирдин яратмишунриз къимет гунал машгъул Мансур Куьревиди Эминан “Наиб Гьасаназ” бахшнавай эсер лезги шииратда сад лагьай поэма яз гьисабзава. Эсердин цIийиз гьат хъувунвай вариантдикай веревирдер авуналди адан мана-метлебдикай ва еке эсердик ида-ада кухтунвай дегишвилерикай лугьузва.
“Сатира ва юмор” паюна ганвай Хъартасви Шагьвеледан шиирар ва къаравилияр ганва.
Хийир Эмиров
