Алатай йисан “ЛГ”-дин 51-нумрадиз акъатай Ш.Шихмурадован “Намуслу инсан — тешкилатчи — регьбер” кьил ганвай макъа­ла за дикъетдивди кIел­на. Эседуллагь Мамедов зазни хъсандиз чидай кас тир. Ада партиядин­ До­къуз­па­ра райкомдин 1-секретарвиле кIва­лах­завайла, за Усугъчайдин юкьван школада 9-10-классра кIелзавай (1952-1954-йисар). А чIавуз зи вах, дяве­дин активный иштиракчи Ханбике Эмирсултанова райисполкомдин­ председателдин заместитель, гуьгъуьнлай партиядин райкомдин секретарь, езне Амирагьмедов Эмирсултан Усугъчайдин­ юкьван школадин завуч­, имидин хва Аб­дулкеримов Сейфедин  Къаракуьредин И.В.Сталинан тIва­рунихъ галай колхоздин председатель тир. Заз абуру ва гзаф маса таниш ксари авур их-ти­лат­рай чир хьайивал, Эседуллагь Ме­жидович гзаф къени, михьи, сабурлу, еке лайихлувилер, агалкьунар авай халис регьбер тир.

Гуьгъуьнлай Э.Мамедов Махачкъаладиз хтайла, зун ВЛКСМ-дин обкомда­, “Дагплодопром”, “Дагплодоовощхоз” объединенийра, хуьруьн майишат­дин министерствода ва  “Даггосагропромда” жавабдар къуллугърал хьана. Совещанийра ва маса ва­жиблу мя­ре­катра зунни Э.Мамедов мукьвал-мукьвал гуь­руьш­миш жезвай. Зун инанмиш хьана хьи, адакай ван хьайи ви­ри ихтилатар дуьзбур тир. Заз таниш яшлу инсанривай ван хьайи са ихтилатдикайни лу-гьун­. Са колхоздай Эседуллагь Ма­ме­до­ваз — 1-секретар­диз са лапагдин жендек як ракъурналда. Як гвайди Усугъ­чай­дал Э.Мамедо­ван кIвализ атана, ада рак гатана. КIваляй адан уьмуьрдин юлдаш экъечIна. Атанвайда чпин колхоздин председателди як ракъурнавайдакай лагьайла, дишегьлиди Эседуллагьаз зенгна. Ада а як гъанвайдаз, вич кIеве авай кас туш, як, хутахна, колхоздин складдиз вахкурай, я тахьайтIа, хуьре авай кесиб хизанриз пайрай лагьана. Ихьтин мисалар мадни гзаф ава. Зун инанмиш я хьи, Эседуллагь Мамедов хьтин михьи, намуслу, халкьдихъ галай ксариз лайихлу къимет гуз, вилик кутаз хьанайтIа, уьлкведин кьилиз ам чукIур­дайбур къведачир, чи республикадин акунар, къаматни лап масад жедай.

Ш.Шихмурадова вичин макъалада дуьздаказ къейднавайвал, халкьдиз­ фу гайи, михьидаказ, еке агалкьунар аваз кIвала­хай­­ касдин тIвар эбеди аву­на кIанда. Зи фикирдалди, дидедиз хьайидалай инихъ 100 йис тамам хьунихъ галаз алакъалу яз, Эседуллагь Мамедован тIварунихъ Усугъчайдал, Ахцегьа­­ ва Ме­гьарамдхуьре куьчеяр ягъун, бюстар эцигун, конферен­цияр тухун ку­тугай кар жедай. Къуй Э.Мамедов хьтин дуьз ксарин кьадар чи арайра гзаф хьурай!

Сабир  Наврузов,

РФ-дин ва РД-дин хуьруьн майишатдин лайихлу

работник, Дагъустандин хуьруьн майишатдин ва недай

суьрсетдин министерстводин къвалав гвай

Общественный советдин член