ЦIийи йисан вилик квай йикъара, 91 йисан яшда аваз, яргъалди чIугур залан азардилай гуьгъуьниз зегьметдин ветеран, лайихлу тербиячи ва муаллим, халкьдин образованидин тешкилатчи Музафар Теймуршагьович Гьасанов рагьметдиз фена.
М.Т. Гьасанов 1930-йисан октябрдиз Докъузпара райондин Чахчарин хуьре, муаллимдин хизанда дидедиз хьана. Вичин буба Гьасанов Теймуршагьа хьиз, адани вичин вири уьмуьр халкьдин аялриз чирвилер ва тербия гуниз бахшна. 1955-йисуз Махачкъалада СтIал Сулейманан тIварунихъ галай пединститут акьалтIарайдалай гуьгъуьниз Музафар Теймуршагьовича Хив райондин Цналрин хуьре школадин завучвиле, ахпа директорвиле кIвалахна. Адалай кьулухъ Мегьарамдхуьруьн райондин Хъартас-Къазмайрин, Оружбайрин, Бут-Къазмайрин юкьван школайриз регьбервал гана.
1979-йисуз Музафар Гьасанов ЦIийихуьруьн советдин председателвиле хкяна. Аник 4 хуьр акатзавай. Ина Музафар муаллимди 1985-йисалди кIва-лахна. Вичин вири чирвилер ва алакьунар ада ЦIийихуьруьн ва аник акатзавай хуьреринни агьалийрин агьваллувал, дуланажагъдин шартIар хъсан хьуниз бахшна. Адан девирда сифте яз ЦIийихуьруьн агьалияр тIебии газдалди таъминарна.
Вахт куьтягь хьайила, Музафар Теймуршагьович мад вичин муаллимвилин пешедал хтана, ЦIийихуьруьн юкьван школада лезги ва урус чIаларин муаллимвиле кIвалахна. И кар ада вич пенсиядиз экъечIдалди давамарна.
Музафар муаллимди тарс гайи гзаф аялрикай неинки хуьре, районда, республикада, гьакI гзаф масанрани руководство гудай регьберар, тешкилатчияр хьанва.
Вичин вири уьмуьрда ада республикадин “Лезги газетдихъ”, районрин газетрихъ ва милли чIаларал акъатзавай журналрихъ галаз сих алакъа хвена. Ам гьакьван чешнелу ва тербиялу мухбир яз Кьиблепатан Дагъустанда машгьур хьана.
Зегьметда къазанмишай агалкьунрай Музафар Гьасановаз государстводин ва ведомствойрин хейлин шабагьар, къиметлу пишкешар гана.
Гьайиф, гьуьрметлу инсан, чIехи хизандин кьил чи арадай акъатна. Чна адан хизанриз, мукьва-кьилийриз, чидай вирибуруз башсагълугъвал гузва. Музафар Теймуршагьович Гьасанован экуь къамат чи рикIелай садрани алатдач.
Хуьруьнвияр, санал кIвалахай юлдашар, дустарин десте.
