И йикъара лезги публицистикадинни эдебиятдин векилрив чIехи магьрумвал агакьна. Яргъалди чIугур залан азардикди тIвар-ван авай журналист, публицист ва шаир, РД-дин культурадин лайихлу работник Нариман Алибегович Къарибов рагьметдиз фена.
Н.А.Къарибов 1939-йисуз Докъузпара райондин Къурушрин хуьре дидедиз хьана.
Юкьван мектеб акьалтIарна, ада Ватандин сергьят хуьдай частара къуллугъна. Азербайжандин госуниверситетдин жур-налистикадин факультет акьалтIарайдалай кьулухъ ада вичин рехъ сифте ЦIийи Къурушрин совхоздин, ахпа Хасавюртдин, Избербашдин, Дербентдин шегьеррин газетрихъ галаз алакъалу авуна.
Хейлин йисара адакай “Лезги газетдин” хсуси мухбир хьана. Адан зегьмет “РД-дин культурадин лайихлу работник” лагьай гьуьрметдин тIвар гуналди къейдна.
Шаир яз, Н.Къарибован лезги ва урус чIаларал чапдай акъатнавай “Аманат”, “Зи ачух рикI”, “Югъ нисинилай алатайла”, “Хайи чилин чимивал” ва маса ктабар кIелдайбуру хушдиз кьабулна.
Публицист яз, ада вишералди лап хъсан макъалаяр, тарихдиз талукь веревирдер ва къейдер чи баркаллу рухвайринни рушарин руьгьдин суьретар кхьена. Яни ада чав тунвай ирс кьетIенди, вичин метлеб квахь тийирди я.
Гьайиф, залум ажалдиз мажал чидач. Чна рагьметлудан хизанриз, мукьва-кьилийриз, вири къурушвийриз, дериндай хажалат чIугунивди, башсагълугъвал гузва. Адан экуь къамат чи рикIелай садрани алатдач.
“Лезги газетдин” редакциядин коллектив.
