Гьафтедин рекорд
ВОЗ-ди эхиримжи гьафтеда коронавирусдикди дуьньяда кьейи ксарин кьадар лап гзаф хьанвайдакай малумарнава. Ковиддин къурбандрин кьадар дуьньяда гьафтедин къене 93882 касдив агакьна. ВОЗ-дин сайтдин делилралди, тIугъвал пайда хьайидалай инихъ гьафтеда ихьтин рекъем сифте яз дуьздал акъатнава. Санлай къачурла, дуньяда кьве миллиондилайни гзаф инсанар тIугъвал себеб яз кьена. Вирусди виридалайни гзаф США-дин агьалияр акIажарзава. Азар чукIунин жигьетдай кьвед лагьай чкадал Индия, пуд лагьай чкадал Бразилия, кьуд лагьай чкадал Россия, вад лагьай чкадал Великобритания ала.
Акьуллу сят
Акьуллу сятдивай коронавирусдин азардикай гьеле адан лишанар пайда жедалди хабар гуз жеда. Идан гьакъиндай Америкадин алимри “CBS News” чешмедиз гайи интервьюда малумарна.
Нью-Йоркдин медицинадин Маунт-Синай идарадин духтурри виликамаз коронавирус тайинарун ва азардихъ галаз женг чIугун патал акьуллу сят ишлемишна. Кьилди къачуртIа, AppIe, Garmin ва Fitbit сятери вирус акатунин эвелимжи лишанар тайинариз куьмек гана. Духтурри къейднавайвал, акьуллу гаджетрин куьмекдалди COVID-19 акатнавайдакай адан лишанар пайда жедалди вилик са гьафте виликамаз тайинариз жезва. Яни инсандин сагъламвилин гьалар пис жедалди, азардихъ галаз женг чIугвадай мумкинвал гузва. Пешекарри къейдзавайвал, ихтилат физвай акьуллу сятерал пульсометр ала.
“Спутник V” хкязава
Госдумадин 50 кьван депутатди коронавирусдиз акси рапар ягъун кьетIнава. Парламентдин агъа палатадин спикер В.Володина лагьай гафар “Новости” РИА-ди раижнава.
Гьелелиг КПРФ, ЛДПР, “Сад тир Россия”, фракцийрин регьберри ковиддиз акси рапар янава. Идалай вилик вирусдин инфекцияр сагъарунин ва абурун вилик пад кьунин рекьяй илимдинни информациядин центрадин директор Г. Викулова малумарайвал, “Спутник V” вакцина миллионни зур инсанри ишлемишнава.
Россияда вакцинация гегьеншдиз 18-январдилай гатIуннава. “Спутник V” дуьньяда регистрация авунвай сад лагьай вакцина я.
Трампаз манийвал гуда
США-дин регьбервал авур Д. Трампаз алатай йисуз уьлкведа тIугъвал себеб яз кардик кутунвай къадагъадин серенжемар алудиз кIанзава. Амма уьлкведин цIийиз хкянавай президент Жозеф Байдена адаз манийвал гун хиве кьунва. Ихтилат маса уьлквейрай США-диз финин къадагъадин серенжемдикай я.
Байденан векил Псакиди малумарнавай фикир “Лента.ру” сайтди раижзава. Адан гафаралди, Байдена Трампав а къарар къуватда тваз тадач.
“Здравоохраненидин меслятдалди, администрациядиз и сергьятвилер 26-январдиз къуватдай вегьедай ниятар авач. Аксина, COVID-19 чукIунин гьалар явашарунин мураддалди, чаз къецепатан уьлквейриз фин-хтунин жигьетдай кардик кутунвай къадагъадин серенжемар авайдалайни мягькемариз кIанзава”, — лагьанва Байденан векилди.
Трампа идалай вилик США-диз атунал тайин инсанар патал эцигнавай къадагъаяр 26-январдилай къуватдай вегьез кIанзавайдакай малумарнай.
Биологиядин яракь я лагьана
Украинадин президентдин партиядин патай Верховный Рададин депутат Е.Мошенеца коронавирус биологиядин яракьрин жуьрейрикай сад яз хьун мумкин яз гьисабзава. Идакай “Новости” РИА-ди хабар гузва.
Украинадин премьер-министр Д.Шмыгала ихтилатайвал, ругуд жуьредин вакцина маса къачунин гьакъиндай рахунар кьиле тухузва. Сифте нубатда Китайдин вакцина къачудайвал я. Идакай ада “Интерфакс-Украина” чешмедиз ихтилатна.
Индияди маса къачуда
Индиядин гьукумдарри Россиядивай къанни са МиГ-29 ва цIикьвед 12 Су-30МКИ истребителар маса къачун кьетIнава. “The Times of India” чешмедал асаслу яз, и делилар “Лента.ру” сайтди раижнава.
Индияди талукь арза “Рособоронэкспортдиз” ракъурун фикирдиз къачунва. Къейдзавайвал, цIийи истребителри Индиядин женгинин авиациядин гьалар хъсанардай мумкинвал гуда.
Вагьшидин гьужум
Малайзиядин Саравак штатдин агьалидал вичин кIвалин вилик квай гьаятдин патав крокодилди гьужумна. Идакай “Borneo Post” чешмеди хабар гузва.
Крокодилди дишегьлидин кIвач кьуна. Вагьшидин сарарикай хкат хъувунатIани, кIвачел дерин хирер аламукьна.
Идалай вилик Зимбабведа крокодилди гьужумуникди инсан тахьай мисалнай.
«Лезги газет»
