2020-йис “Лезги газет” патал кьетIенди хьун лазим тир. Амма, чна еке умудривди гуьзлемишай ам вири дуьнья патал кьетIенди хьана — акьалтIай муракабди тир и йис чи бейнидай бажагьат акъатда. ЯтIани, четинвилер гзаф авайтIани, шадвиливди къейд ийиз кIанза-ва хьи, хайи чIалал акъатзавай чи газетдихъ галаз алакъа хуьзвай ксарин кьадар тIимил хьанач, гьатта майдандиз цIийи авторарни акъатна, иллаки — жегьилар. И жигьетдай чаз “Лезги газетдихъ” галаз датIана алакъа хуьзвай чи амадагриз, газет кIелзавай, ам подписка ийизвай, цIийи теклифар гузвай — са гафуналди, къайгъударвалзавай гьар са ватанэгьлидиз рикIин сидкьидай сагърай лугьуз кIанзава.
Алатай йисан нетижаяр
Адет хьанвайвал, пешекар суварин вилик — ЦIийи йисан сифте йикъара, “Лезги газетдин” редакцияди йисан вахтунда кьиле тухвай кIвалахдин нетижаяр кьуна, кьилди къачуртIа, хайи чIал хуьник кьетIен пай кутурбур, газетдихъ галаз сих алакъа хвейибур, хъсан макъалайрин авторар вужар ятIа тайинарна, 2020-йис патал малумарай конкурсрин нетижаяр кьуна.
“Лезги газетдин” сад лагьай редактор, фольклорист, литератор, чIехи алим, общественный деятель Гьажибег Гьажибегован тIварунихъ галай премия — 10 000 манат — милли журналистика, литература, илим вилик тухунин кардик лайихлу пай кутунай гузва.
2020-йисан нетижайралди, и премиядиз “Лезги газетдин” яшайишдин ва чарарин отделдин редактор Рагнеда Рамалданова лайихлу хьанва. Чи уьлкве патал акьалтIай четинди хьайи алатай йисан вахтунда агьалийрин яшайишдиз ва сагъламвилиз талукь жуьреба-жуьре месэлайрай кьил акъудиз, гъавурда тваз, газет кIелзавайбурулай агакьзавай суалриз жавабар гьазуриз, Рагнеда Рамалдановади вич милли журналистикадин лайихлу векил тирди нубатдин сеферда тестикьарнава.
Лезгийрин машгьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, чи халкь паталди вичин метлеб садрани квахь тийидай ва вичиз тешпигь авачир урус чIаланни лезги чIалан таржумадинни баянрин (переводно-толковый) зурба словарь (35 агъзур гаф ава) багъишай Мегьамед Гьажиеван тIварунихъ галай премия — 5000 манат — лезги чIал хуьник, чируник, ахтармишуник, девлетлу авуник пай кутурбуруз гузва.
И сеферда премиядиз “Лезги газет” кIелзавайбуруз фадлай таниш автор, Хасавюрт райондин Къурушрин хуьряй тир чи мухбир Гьажи Къазиев лайихлу хьанва. Тежрибалу, камаллу муаллимди ва мухбирди халкьдин яшайишдин, ацукьун-къарагъунин жуьреба-жуьре месэлайрикай кхьизва. Хайи чIал, меденият, адетар хуьнин, акьалтзавай несил ватанпересвилин тербиядаллаз чIехи авунин важиблувал — и месэлаяр адан вири яратмишунра гьисс ийиз жеда, абуру рикIик гьамиша секинсузвал кутазва.
2020-йис чи уьлкведа ЧIехи Гъалибвилин 75 йис тамам хьунинди тир. Гьаниз килигна, ам мусибатдин дяведин вакъиаяр, Ватан душмандикай азад авунин рекье чан эцигай игитар, Гъалибвал мукьва авун патал зиллетар эхай халкьдин зегьмет рикIел хуьнин ва баркаллувилин йис яз малумарнай. И месэладиз талукь яз “Лезги газетдини”, адет хьанвайвал, пуд чкадикай ибарат конкурс малумарнай.
ИкI, 1-премиядиз — 3000 манат — “Бахтунин накъвар” новелладай (“ЛГ”-дин 29-нумрада чапнава) Сулейман-Стальский райондин Асалдхуьряй тир шаир ва журналист Абидин Камилов лайихлу хьанва.
2-премия — 2000 манат — дяведин темадай кхьенвай са жерге макъалайрай Сулейман-Стальский райондин Эминхуьряй тир шаир ва журналист, “Лезги газетдин” саки виридалайни активный, тежрибалу мухбиррикай сад тир Хазран Кьасумова къазанмишна (“ЛГ”-дин 18, 20, 23-нумраяр).
3-премиядиз — 1000 манатдиз — шиирралди кхьенвай эсердай (14-16-нумрайра чапнава) Мегьарамдхуьруьн райондин Советский хуьруьн юкьван мектебдин муаллим Сулейман Пашаев лайихлу хьанва.
2020-йисуз хайи чIалал публицистикадин диб кутур “Лезги газетдин” 100 йис тамам хьана. Лишанлу и вакъиа фикирда кьуна, алатай йисуз чна газетдин юбилейдиз талукьарнавай конкурсни малумарнай. Асул шартIарикай сад лезги публицистикадин эсерар теснифуникай ибарат тир. Лезги халкьдин яшайишдиз, дуланажагъдиз, ацукьун-къарагъуниз талукь и конкурсни пуд чкадикай — пуд премиядикай ибарат тир.
1-премия — 3000 манат — “Лезги газетдин” тарихдикай ва алай вахтуникай, “халкьдин чирагъдин” ишигъ хуьнин кардик чпин пай кутур баркаллу ксарикай ва икI мад макъалаяр кхьинай “Лезги газетдин” литературадин отделдин редактор, шаир ва публицист Мердали Жалиловаз гун къарардиз къачунва.
2-премия — 2000 манат — лап хъсан гьикая кхьинай, газет кIелзавайбуруз фадлай таниш автор, “ЛГ”-дин амадагрикай сад, Хив райондин ЦIийи Фригърин юкьван мектебдин лезги чIалан муаллим Абдул Ашурагъаеваз гудайвал хьанва. 2020-йисан 35-нумрада чапнавай адан “Шаламрал алахъмир” макъала кIелзавайбуру, гьамиша хьиз, хушвилелди кьабулнава. Адан къелемдикай алатай йисуз милли газетдин 100 йис тамам хьуниз бахшнавай кIватIални хкатнава.
3-премия — 1000 манат хъсан шиир кхьинин шартIуналди гун кьетIнавай. И премиядиз “Тебрикзава” шиирдин (2020-йисан 44-нумра) автор, Хив райондин ЦIийи Фригърин мектебдин 11-классдин ученик Шамил Гьуьсейнов лайихлу хьанва.
«Хъсан шикил» ва «ИкIни жеда кьван!» конкурсар (премия — 1000 манат) “ЛГ”-дин редакцияда кардик кваз гзаф йисар я. Гьайиф хьи, алатай йисан вахтунда “Хъсан шикил” конкурсдин шартIариз жаваб гудай шикилар чав агакьнач. Гьаниз килигна, и номинация ичIиз амукьнава.
«ИкIни жеда кьван!» номинацияда и сеферда “Калушар гьикI рахкурда?” юмореска кхьей (2020-йисан 18-нумра) Роза Мингьажидинова гъалиб хьана. Адан аялар патал кхьизвай куьруь, амма дерин манадин таъсирлу гьикаяйри, макъалайри газет кIелзавайбурун итиж фадлай желбзава.
Алатай йисуз чна жегьил несилар хайи чIалал ва литературадал ашукьарунин ва абурун арада бажарагълубур тайинарунин мураддалди цIийи мад са шумуд конкурс малумарнай.
ИкI, редколлегиядин къарардалди, “Гьевес кутадай премия” — 1000 манат ва диплом — пуд касдиз гудайвал хьана.
Сад лагьайди — тербиядин темайрай са жерге макъалаяр кхьей Ахцегь райондай тир чи газетдин амадаг Нариман Мамедоваз.
Кьвед лагьайди — чIалаз ва медениятдиз талукь макъалайрин автор, Мегьарамдхуьруьн райондин Бут-Къазмайрилай тир Тамила Салмановадиз.
Пуд лагьайди — “Лезги газетдин” интернет-изданидин жегьил мухбир, шаир, критик Мурад Саидоваз.
Жегьил несилар, кьилди къачуртIа, мектебра кIелзавай аялар ва студентар хайи чIалал ва литературадал желбунин ва абурун арада бажарагълубур тайинарунин мураддалди чна мад пуд конкурс малумарнай.
ИкI, “Виридалайни хъсан гьикая” конкурсдин — (3000 манат ва диплом) — чка и сеферда ачух яз амукьнава.
Кьвед лагьай конкурсдин — “Виридалайни хъсан очерк” — гъалибчи Кьурагь райондин Ашарин хуьряй тир ДГУ-дин филологиядин факультетдин урус ва лезги чIаларин отделенидин студентка Нармиля Абдурагьманова хьанва. Ада вичин хайи хуьруькай, адан тарихдикай ва къенин юкъуз авай гьалдикай, жемятдин вилик акъвазнавай месэлайрикай кхьенвай эсер газетдин 32-нумрада чапнава.
Гьа са вахтунда, пуд лагьай конкурсдин — “Виридалайни хъсан шиир” (1000 манат ва диплом) — нетижаяр кьадайла, редколлегияди и йисузни кьве гъалибчи хкянава. ИкI, са премия Докъузпара райондин ЦIийи Къаракуьредин юкьван мектебдин 7-классда кIелзавай Мерлан Эюбоваз гудайвал хьана. Малум хьайивал, гададин рикI дидед чIалал ва литературадал гзаф ала. Ам хайи чилелни, адан тIебиатдални ашукь я. Адан ватандикай кхьенвай шиирар газетдин 5-нумрада чапнава.
Кьвед лагьай премиядиз Сулейман-Стальский райондин КIварчагърин хуьруьн юкьван мектебдин 10-классда кIелзавай Зарема Къадималиева лайихлу хьанва. Дидедикай кхьенвай (2020-йисан 22-нумра) адан шиирди рушан кьатIунрал ва алакьунрал дамах ийиз тазва. Баркалла квез!
Конкурсра гъалиб хьанвай вири юлдашриз редакциядин коллективди агалкьунар рикIин сидкьидай тебрикзава ва инлай кьулухъни абурулай метлеблу, маналу макъалаяр агакьдайдак умуд кутунва. Премиярни дипломар, редакциядиз атана, вахчуз жеда.
Жасмина Саидова
