Дагъустандин автономиядин — 100 йис
Накь, 20-январдиз, Дагъларин уьлкведин вири шегьерра, районра, карханайра, идарайра ДАССР-дин виш йис тамам хьунихъ галаз алакъалу тир шад мярекатар кьиле фена. ГьикI лагьайтIа, алатай баркаллу виш йисуз уьлкведа кьиле фейи вири важиблу вакъиайра дагъустанвийри иштиракна, уьлкведин халкьдин майишатдин вири хилер вилик тухуник чпин лайихлу пай кутуна. Вилик фенвай уьлквейрилай, РСФСР-дин са бязи регионрилай хейлин гуьгъуьна амай республикади азадвилихъ, мублагьвилихъ, абадвилихъ, савадлувилихъ ахьтин камар къачуна хьи, са куьруь вахтунда ам хуьруьн майишат, промышленность, энергетика, образование, илим, медицина ва маса хилер вилик физвай макандиз элкъвена. Виридалайни кьилинди, дагъустанвийри чпин садвал, халкьарин арада дуствал хвена.
Республикадин руководстводин тIварцIихъ гзаф чкайрай сувар тебрикзавай чарар къвезва. Виридалайни вилик ихьтин тебрик РФ-дин Президент Владимир Путинилай атана. Ана кхьенва:
“Гьуьрметлу дустар!
Квез за Дагъустан Республика тешкилайдалай инихъ 100 йис тамам хьунин юбилей мубаракзава!
Хейлин асирра Дагъустандикай гзаф халкьариз, жуьреба-жуьре культурайрин векилриз кIвал хьана. Абурун тарихдин девлетлу ирс, мугьманар кьабулунин ва къуншивилин хъсан адетар, яратмишунин зегьмет чIугунал рикI хьун, хизандив игьтиятлувилелди эгечIун, чIехи несилдиз гьуьрмет авун хьтин ерияр несилрилай несилрал агакьарзава. Къени куьне руьгьдин, ахлакьдин, марифатдин и ерийриз къуллугъзава, асулдай авай адетрал чан хкизва, машгьур ватанэгьлийрал (алимрал, спортсменрал, государстводин деятелрал, дирибаш аскеррал) дамахзава. Абуру республикадин ва уьлкведин агалкьунрик кутунвай пай екеди я. Республикадин агьалийрин лап хъсан ерияр, уьтквемвал, дирибашвал, къастунал кIевивал международный террористрихъ галаз женг чIугвадайла, Дагъустан ва Россияни хуьдайла мад сеферда раиж хьана.
Чи Ватан ва Дагъустан Республика абад авунин карда квехъ еке агалкьунар хьурай!”
Виш йисан юбилей, азадвилин ва абадвилин сувар дагъустанвийриз рикIин сидкьидай РД-дин Кьилин везифаяр вахтуналди тамамарзавай Сергей Меликовани тебрикна.
— Къе Дагъустандин гьар са халкь ва агьали, вири республика патал кьетIен ва шад югъ я, — лагьана С.Меликова. — Виш йис идалай вилик, 1921-йисан 20-январдиз, Вирироссиядин Центральный Исполнительный Комитетди ДАССР тешкилунин гьакъиндай кьабулай декретди Россиядин къурулушдик акатай Дагъустандин государстводин бинеяр кутуна. Тарихдин зурба метлеб авай и документди дагъви халкьарин къаст тайинарна ва Дагъустандинни Россиядин чIуриз тежер садвал мягькемарна.
Гегьенш ихтияррин иеси хьайи Дагъустанди са куьруь вахтунда хейлин хилерай виликди еремишна ва вичихъ зурба крар тамамардай мумкинвилер авайди субутна.
Дяведин йисарин азабриз, четинвилериз дурум гуналди, Дагъустандин халкьари садвал хвена ва уьлкведин маса халкьарихъ галаз намуслувилелди зегьмет чIугуна. Владимир Путинан регьбервилик кваз 1999-йисуз яракьлу бандитрин дестейрин хура акъвазуни неинки государство чукIуникай хвена, гьакIни Россиядин тарихдин цIийи чинар кхьидай мумкинвал арадал гъана.
Къенин гьалариз ва гележегдизни дуьзгуьн къимет гун патал чун жуван халкьдин тарихдив гьуьрметдивди эгечIун ва адавай хъсан тарсар къачун лазим я. Виш йисан тарихди кьетIивилелди шагьидвалзава хьи, чи къенин ва гележегдин абадвал, мублагьвал Россиядин халкьарихъ галаз санал Дагъустандин вири халкьарин садвал хуьнихъ ва ам мадни мягькемарунихъ галаз алакъалу я.
Дагъларин уьлкве вичин кIвал, Ватан яз аквазвай гьар садаз Дагъустан къуватлу, абад яз акуна кIанзава.
Вири дагъустанвийриз республикадин руководстводин патай рикIин сидкьидивди Дагъустан АССР-дин 100 йисан юбилей тебрикзава!
Чи чилел ислягьвал, квехъ сагъламвал, мублагьвал хьурай!
ДАССР-дин 100 йисан юбилейдиз талукьарнавай кьилин мярекат 20-январдин сятдин садаз Каспийскда, А.Алиеван тIварунихъ галай спортдин дворецда, кьиле фена. Ана СКФО-да РФ-дин Президентдин патай тамам ихтиярар ганвай векил Ю.Чайкади, РД-дин Кьилин везифаяр вахтуналди тамамарзавай С.Меликова, РД-дин Халкьдин Собранидин депутатри, РД-дин Гьукуматдин членри, хейлин мугьманри иштиракна.
Нянихъ, сятдин ругудаз, Урусрин госдрамтеатрдин чIехи залда кьвед лагьай мярекат кьиле фена.
Мярекатрикай гегьеншдиз
РД-дин Кьилин сайтдай кIелиз жеда.
Нариман Ибрагьимов
