18-январдилай Махачкъалада коронавирусдиз акси рапар ягъиз гатIуннава. Республикадин меркездин администрациядин пресс-къуллугъди хабар гузвайвал, Дагъустанда рапар ягъун патал 27 центр арадал гъанва, абурукай 12 Махачкъалада кардик ква.
Сифте нубатда, рапар духтурризни муаллимриз ядайвал я. Раб ядалди вилик коронавирусдин талукь антитела авани, авачни тайинарун патал махсус тест тухузва. Антитела авайбуруз раб язавач. Бедендин чимивал, давление ахтармишзава.
Дагъустанда коронавирусдиз акси яз язавай рапунин тIвар “Гам-КоВид-Вак” (“СпутникV”) я. Ам арадал гъанвайбуру тестикьарзавайвал, и вакцина тIугъвалдиз аксибурун арада виридалайни къуватлубурукай сад я.
Къейд ийин хьи, коронавирусдиз акси раб разивал аваз ва пулсуздаказ язава. Вакцинадиз акъатзавай пулдин такьатар федеральный бюджетдай чара авунва.
Эгер куь арада раб ядай фикирдал алайбур аватIа, квевай яшамиш жезвай чкада авай поликлиникадиз хабар гуз ва я куьн паталди къулай чкада раб ягъун патал “Госуслуги” порталдин куьмекдалди нубатда акъвазиз жеда. И жигьетдай гегьенш малуматар РД-дин здравоохраненидин министерстводин сайтдай жагъида.
«Лезги газет»
