Чи ватанэгьлияр — гьар сана
Чахъ, лезгийрихъ, гъурбатра жуьреба-жуьре жавабдар къуллугърал алай баркаллу, чпин тIварар краралдини агалкьунралди машгьур ийизвай ватанэгьлияр гзаф ава. Гьа ихьтинбурукай сад Ставрополдин крайда Россиядин МЧС-дин начальникдин заместителдин къуллугъдив эгечIнавай къенепатан къуллугъдин полковник Апрель Агъакишиевич Агъакишиев я.
1977-йисан 29-апрелдиз Ахцегь райондин Смугъулрин хуьре дидедиз хьайи Апрель Агъакишиева мектебда кIелай чIавалай вич савадлу, агалкьунрихъ агакьдай къастар авай жаван яз къалурна. 1994-йисуз ам Ахцегь райондин военный комиссариатдин теклифдалди Камышинский инженерринни эцигунардайбурун военный кьилин училищедик экечIна. 1998-йисуз, училище чукIурна масанриз пай хъувурдалай кьулухъ, Самарадин областдин Тольяттидин военный инженерно-технический университетда кIелна куьтягьна.
Университет куьтягьайдалай кьулухъ, 1999-йисуз, ам гражданский оборонадин кьушунра къуллугъ кьилиз акъудун патал Камчатский областдин мулкариз ракъурна. Вичин къуллугъ ада Камчатка полуостровдал лейтенантдин тIвар аваз, рекьерин кьилдин взводдин командир яз башламишна ва къутармишунин 1043-нумрадин центрадин штабдин начальникдин къуллугъдалди акьалтIарна. 2003-йисуз Москвада кардик квай В.В.Куйбышеван тIварунихъ галай военно-инженерный академиядин гражданский оборонадин факультетдик экечIна ва 2016-йисуз анаг агалкьунралди куьтягьна. ТIвар-ван авай академия куьтягьай, вичихъ алакьунар авай пешекар Россиядин МЧС-дин Центральный региондин центрадиз рекье туна. Ана, Россиядин МЧС-дин ЦРЦ-да, сифтедай чи ватанэгьлиди жуьреба-жуьре къуллугъар ва гуьгъуьнлайни ватандашрин тереф хуьнин управленидин начальникдин чIехи къуллугъ кьилиз акъудна.
А.Агъакишиева ЦФО-дин мулкара эхиримжи вахтара кьиле фейи лап чIехи, чIуру гьалар (хасаратар, мусибатар, террористрин крар ва хейлин маса вакъиаяр) тергунин, арадай акъудунин карда, гьакIни тади гьалда серенжемар кьабулунин гьазурвилер акунин жигьетдай международный жуьреба-жуьре мярекатра, гьа жергедай яз СНГ-дин дережадани, иштиракна. Гьавиляй гьахълудаказ лугьуз жеда: ихьтин ватанэгьли неинки лезги халкьдин, гьакI вири уьлкведин дамах я.
2016-йисан августдиз ам Россиядин МЧС-дин министрдин къарардалди Туладин областда Россиядин МЧС-дин кьилин управленидин начальникдин сад лагьай заместителвиле тайинарна. Машгьур ватанэгьлидин лайихлувилер и къурулушдин ва государстводин шабагьралди къейднава. Ада вичин уьмуьрдин юлдашдихъ галаз рушаз тербия гузва.
2020-йисан апрелдилай ада Ставрополдин крайда МЧС-дин начальникдин заместителдин везифаяр вахтуналди тамамарна. Мукьвара чаз малум хьайивал, 2020-йисан 28-декабрдиз РФ-дин Президент В.Путинан къарардалди чи ватанэгьли Ставрополдин крайда Россиядин МЧС-дин начальникдин заместителдин къуллугъдал тайинарнава.
Чи мурад ам къуллугъдин гурарай мадни вини кукIушриз хкаж хьун я.
К.Ферзалиев
