И йикъара “Лезги газетдин” редакциядиз Госдумадин депутат  Гьажимет  Керимович  Сафаралиев  мугьман хьанвай. Газетдин кьилин редактор Мегьамед Ибрагьимовахъ галаз кьиле фейи гуьруьшдин вахтунда ­абуру хайи чIалар хуьнин ва вилик тухунин, милли прессадин месэлаяр, “Лезги газетдин” 100 йисан юбилей къейд авунин гьа­къиндай кьабулзавай серенжемар вере­вирдна.

Дагъустандин хайи чIаларикай раха­дайла, Гьажимет Сафаралиева абур хуьнин ва вилик тухунин карда милли чIаларал акъат­завай газетрихъ еке метлеб авайди къейдна.

“Милли чIаларал акъатзавай газетар Да­гъустандин дамах я. Дидед чIал гьар садаз чир хьана, вичел дамахна, саламатдиз гуьгъуьнлай къвезвай несилрал агакьарна кIанзавай медениятдин девлетлу ирс я”, — лагьана депутатди.

Вичин рахунра Гьажимет Сафаралиева “Лезги газетди” Интернетдин майданрани хъсандиз кIвалах вилик тухузвайдакай, газетдин сайт республикадин электронный СМИ-рин арада кIвенкIвечи жергейра ­авайдакай лагьана. “Куьн девирдихъ галаз кам-камуна аваз физва. Газетдихъ галаз санал сайтни кардик кутун, ам агалкьунар аваз вилик тухун тебрикиз жедай кIвалах я. И карда заз квехъ ва редакциядин вири коллективдихъ ЦIийи йисуз мадни еке агалкьунар хьана кIанзава”, — алава хъувуна депутатди.

Мегьамед Ибрагьимова вичин нубатда редакциядин кIвалахдикай, къенин юкъуз авай гьаларикай, кьилиз акъудзавай проектрикай, 100 йисан юбилей къейд авуниз талукь планрикай лагьана.

“2020-йисуз “Лезги газетдин” 100 йис тамам хьана. Амма дуьньяда пайда хьайи коронавирусдин тIугъвалди юбилейдин мярекатар кьиле тухудай мумкинвал ганач. Аллагьди гайитIа, газетдин юбилей алай йисуз къейддайвал я. И вакъиа 2021-йисуз кьиле тухудай республикадин метлеб авай мя­рекатрин сиягьдикни кутунва. Юбилейдихъ галаз алакъалу яз, газетдин тарихдикай ­до­кументальный фильм гьазурдай, ктаб ­акъуддай, кIелзавайбурухъ галаз гуьруьшар, школьникрин арада жуьреба-жуьре конкурсар… тухудай ниятар ава”, — хабар гана кьи-лин­ редакторди.

Гуьруьшдин сергьятра аваз Гьажимет Сафаралиева редакциядиз куьмек яз вичин патай 60 агъзур манат пул гана ва “Лезги газетдихъ” галаз авай алакъаяр мадни мягькемардайди къейдна.

Эхирдай Мегьамед Ибрагьимова ре­дакциядиз мугьман хьунай, пулдин куьмек гунай­ Гьажимет Сафаралиеваз сагърай лагьана.

Агьмед  Магьмудов