2021-йисан  тебрикрихъ галаз зав са цIеп-цIийи  хабарни агакьна: “Интернетдиз “Къайи рагъ” тIвар алай сад лагьай лезги ­художественный кинофильм  акъат­нава!”

Зун кьадар авачир кьван шад хьана.Гьа легьзеда рикIел чи ала­­­­кьунар авай зари Седакъет Керимова, адан “Къайи рагъ” ­ро­­­ман акьалтна, за фикирна: “Ихьтин кинофильм майдандиз акъуд­­на­вайди анжах Седакъет  ханум я”.

ГьакI хьунни авуна: 3-январдиз “Къайи рагъ” кинофильм “Юждаг” телеканалдай мад сеферда къалурна, ам заз, зи хи­зан­дизни акуна. “Къайи рагъ” Лезгистандин багълар-дагълар, хуьрер-кIвалер къалурзавай, лезгийрикай суьгьбетзавай, игитар-иштиракчияр лезги чIалал рахазвай (лезги текст урус чIа­лаз­ элкъуьрнавай), халкьдин адетар, манияр ва музыка квай, кьве паюникай ибарат сад ла­гьай лезги художественный кино-тамаша я.

“Къайи рагъ” фильмдин гьерекатар Лезгистанда ва адалай къерехра Ватандин ЧIехи дяведилай виликан ва гуьгъуьнин йисара кьиле физва. Тамашзавайди фильмдин кьилин игитрин, ил­лаки Яргунатанни Ярметан, мурадар кьилиз акъат тавур, залан, пашман кьадарри-кьисметри чпелди чIугвазва. Абурухъ галаз ки­нофильмдин ажайиб тIвар­ни кьазва — “Къайи рагъ”. И тIвар лез­ги халкьдин  кьисметдихъ галаз кьазвайдини гьиссун  четин туш.

Заз ихьтин ивирдин, цIийи йисан багъишдин сценарий кхьей  Седакъет Керимовадиз, игитрин ролра къугъвай артистриз, абурун рахунар урус чIалаз элкъуь­рай заридиз, шикилар чIугур пешекарриз, кинофильм дуьнь­я­­диз къалурай “Юждаг” каналдин регь­­бердиз, кьве паюникай ибарат кинофильм майдандиз акъудун патал чIугур вири зегьметрин къиметар-гьахъар гайи жумарт рухвайриз аферин! Вири пара кьадар сагърай!

Телевизордин экрандилай чаз мад ва мад лезги художест­венный кинофильмаяр аквадайдак за умуд кутазва.

Гьаким  Къурбан